رفض ياخد مني فلوس الأكل لأني مسلم من بلد الأزهر الشريف.. مصري يروي موقفًا مؤثرًا حدث له بمطعم في الصين
روى بلوجر مصري في الصين تفاصيل موقف مميز حدث له في مطعم إسلامي بالصين؛ حيث رفض صاحب المطعم أخذ المقابل المادي للطعام بعدما عرف أنه مسلم ومغترب.
إبراهيم نجم يروي تفاصيل موقف حدث له بالصين
وتحدث البلوجر إبراهيم نجم، صاحب الواقعة، في تصريحات خاصة لـ القاهرة 24، عن تفاصيل الموقف الذي حدث له بالصين قائلًا: حدث لي الموقف أثناء زيارتي لمدينة هانجو شرق الصين، عندما دخلت رفقة صديق لي إلى أحد المطاعم الإسلامية التي تقدم أطعمة حلالا، فقابلنا إسماعيل صاحب المطعم، وبعد تناولنا الطعام رفض صاحب المطعم أخذ حق الطعام، وقال: كلنا مسلمون كلنا إخوة.
وأضاف إبراهيم نجم: وبعدها تحدث معنا، وعبر عن حبه لمصر، عشان أخوه الصغير درس في الأزهر الشريف، كما تكلم عن تعاليم الأزهر الشريف والدين الإسلامي، وقيامه بنشر تعاليم الأزهر بين أفراد قريته، وشرح لنا فضل مصر والأزهر على أفراد أسرته، وعرفنا كمان على أولاده، وحاولنا أكتر من مرة أننا ندفعله فلوس الأكل، عن طريق الدفع الإلكتروني أو بالفلوس الكاش، أو حتى إعطاء الفلوس لأطفاله كهدية، لكنه رفض أيضًا، وأصر على الرفض بسبب كوننا مغتربين، وأننا إخوة، ولزم نقف جنب بعض.
وتابع: وبعدها شكرناه ومشينا، لكن أنا وصاحبي كنا عاوزين ندفع للراجل فلوسه، وكمان بعد ما عرفت من بنته إن ظروفه صعبة وعشان كده بنته مدخلتش المدرسة، ورغم ظروفه الصعبة دي رفض ياخد مني فلوس الأكل، وبعدها فكرت إني لازم أروحله تاني واتغدى عنده وادفعله الفلوس، وبالفعل روحتله ولقيته مرحب بيا جدًا وحضرلي الأكل، وعشان كان المطعم مفهوش زباين، واتكلمنا في عدة أمور منها رغبته في التعلم في جامعة الأزهر، وانبهر لما عرف إن في ناس كتير في مصر حافظة القرآن الكريم.
وأكمل: وأنا بتكلم معاه حاولت أعرف منه سبب عدم ذهاب ابنته للمدرسة لكنه قالي إنها هتدخل السنة الجاية المدرسة، ومذكرش أي شيء ليه علاقة بظروفه المادية، وهو من تعففه قطع فكرة إني أساعده بأي شكل.
إبراهيم نجم: صاحب المطعم رفض ياخد مني الفلوس بعد ما عرف إني مسلم
واختتم: استغليت فرصة إنه راح يصلي ودفعت فلوس الأكل بالدفع الإلكتروني ومشيت، لكن وأنا في الطريق كلمني وزعل جدًا بسبب إني دفعت الفلوس، ورجعلي الفلوس، وقالي لو عاوزنا نتقابل تاني لازم تقبل الفلوس، وبعدها أصريت على نشر الموقف المميز ده.
