نيللي كريم تُسلم كاملة أبو ذكري جائزة فاتن حمامة في افتتاح مهرجان القاهرة السينمائي
سلمت الفنانة نيللي كريم جائزة فاتن حمامة للتميز للمخرجة كاملة أبو ذكري، وذلك في افتتاح مهرجان القاهرة السينمائي الدولي في دورته الـ 44، وذلك تقديرا لما قدمته طوال مسيرتها الفنية التي انطلقت منذ تسعينيات القرن الماضي.
وقالت نيللي كريم على خشبة المسرح أثناء تقديم جائزة فاتن حمامة: النهارده حظي حلو لسببين، الأول إني بقدم جائزة سيدة الشاشة العربية فاتن حمامة، والسبب التاني إن الشخصية اللي هقدملها الجائزة مكنتش عارفة هقدمها إزاي؛ لأني كل مرة ببقى عايزة أقدمها ببقى حساسة، هي مخرجة عظيمة وصادقة وهي قدرت تشوفني بشكل مختلف وأثرت في الدراما المصرية بشكل مختلف، بس في الحقيقة دمها خفيف وزي السكر، قدرت تعيشنا في الروايات اللي بتقدمها بشكل صادق.
وقالت المخرجة كاملة أبو ذكري بعد تسلمها الجائزة: أنا مش عارفة أقول إيه، حلم كبير مش مصدقة إنه بيتحقق أو حاجة مكنتش في خيالي أصلًا، الحقيقة فيه امتنان وحب وتقدير لكل الفنانين اللي قابلتهم واللي آمنوا بيا وحتى اللي مآمنوش بيا وأثروا فيا، مشوار كبير وبشتغل من وأنا 16 سنة وعمري كله قضيته في السينما فيه عشق وفيه حب، مهرجان القاهرة كنت بحلم بس أدخله ودلوقتي أنا واقفة بتكرم.
وأضافت: تحية تقدير لكل فنان شوفتله فيلم أو مشهد حلو واتعلمت منه حاجة وكل فنان اشتغلت معاه وعلمني حاجات كتير، منهم نادر جلال وعاطف الطيب ورضوان الكاشف وأسامة فوزي وأحمد زكي ومحمد خان ونور الشريف، وناس كتير قدمتلي دعم وكبرتني ووصلوني للحظة دي، بشكر بنتي وجوزي اللي تعباهم معايا وجننتهم معايا من لحظة المهرجان وبشكر أمي وأبويا واللي لولاهم عمري ما كنت هقف على المسرح هنا.
وسبق وعلق الفنان حسين فهمي، رئيس مهرجان القاهرة السينمائي، على قرار التكريم قائلا إن كاملة أبو ذكري مخرجة موهوبة لها بصمة مميزة في كل عمل أخرجته وأشرفت على صناعته، لذا وجب تكريمها من قِبل مهرجان يُقدر الفن ويدعم صانعيه، ليس في مصر فقط وإنما في العالم كله.
تكريم لبلبة في مهرجان القاهرة السينمائي
كما كُرمت الفنانة لبلبة، بجائزة الهرم الذهبي لـ إنجاز العمر، خلال افتتاح الدورة الـ44 من مهرجان القاهرة السينمائي الدولي، تقديرًا لما قدمته على مدار مشوارها الفني.
وكان حسين فهمي وزوجته من أوائل الحضور على ريد كاربت مهرجان القاهرة السينمائي، كما ظهرت الإعلامية بوسي شلبي على ريد كاربت المهرجان.
وحرص الفنان حسين فهمي، رئيس مهرجان القاهرة السينمائي الدولي، على تحية أبطال الأولمبياد الخاص لذوي الهمم في حفل افتتاح المهرجان بدورته الـ 44.
مهرجان القاهرة السينمائي
وفي سياق متصل، حرصت الدكتورة نيفين الكيلاني، وزيرة الثقافة، والفنان حسين فهمي، رئيس مهرجان القاهرة السينمائي الدولي، خلال الساعات الماضية، على تفقد اللمسات النهائية، للتجهيزات والترتيبات، وشملت الجولة التفقدية، الوقوف على حالة التجهيزات الخاصة بالسجادة الحمراء، المُخصصة لاستقبال ضيوف المهرجان، وحالة الجاهزية لمسارح الأوبرا المتعددة المستضيفة للمهرجان.
