تنبأ بـ وفاته.. صديق الموسيقار محمد سلطان يكشف اللحظات الأخيرة في حياة الراحل: قال فايزة أحمد عايزاني ضروري
كشف محمد كامل صديق الموسيقار محمد سلطان، أن الراحل تنبأ بـ وفاته قبل 10 أيام من تاريخ الوفاة الفعلي، مؤكدًا أن الراحل لم يصدق وفاة زوجته الفنانة فايزة أحمد، حتى يوم رحيله.
وقال كامل صديق الموسيقار محمد سلطان، لـ القاهرة 24: أنا صديق عمر الأستاذ محمد سلطان، وقبل وفاته بـ 10 أيام، قال أنا كده خلاص حلو أوي، فايزة جاتلي في الحلم وقالتلي تعالى يا محمد أنا عايزاك ضروري علشان نتجمع مع بعض.
وعن عدم تصديق الموسيقار محمد سلطان، وفاة الفنانة فايزة أحمد، فأوضح: كان بيقول لي مين قالك إن فايزة ماتت، وكان عامل مخدات عليها صورها وحاطتها في البيت كله، وجاله عرايس كتير ورفض وقال بعد فايزة مفيش خالص، وربى أولاده منها الدكتور عمرو والدكتور طارق، دول عاملين دلوقتي مستشفى في فرنسا.
وتابع: فايزة كانت كل حياته، وقعد بيها في المستشفى لما جالها سرطان الثدي، وكان معاها لغاية وفاتها.
وصية الموسيقار محمد سلطان
وكشف صديق الموسيقار محمد سلطان، عن وصيته قبل رحيله، قائلًا: وصيته إن الناس اللي كان بيطلع لهم المساعدات تستمر المساعدات دي بعد وفاته، وكان بيحب يأكل القطط وكان مربي قطط كتير عند بيته.
وفاة الموسيقار محمد سلطان
رحل عن عالمنا أول أمس الأحد الموسيقار محمد سلطان، عن عمر ناهز الـ 85 عامًا، بعد إصابته أزمة قلبية نُقل على إثرها أحد المستشفيات الكبرى بالقاهرة.
