هددها بمصير نيرة أشرف.. والدة فتاة المحلة: خطيب بنتي ولع في الشقة.. وعفش العروسة اتحول خردة
كان طالع يولع في الشقة عشان مفكرني أنا وبنتي فيها ويولع فينا، ده مش بني آدم، أنا مش عارفة عملناه معاه إيه، كل ده عمله عشان بنتي سابته، بهذه الكلمات قالت ميرفت شريف والدة الفتاة دنيا خطيبة المتهم الذي قام بإشعال النيران في شقتها انتقاما منها بسبب فسخ خطوبة نجلتها بعد ارتباط لمدة عام ونصف لسوء سلوكه.
بنتي فسخت خطوبتها لسوء سلوكه
وأضافت والدة المجني عليها: كنت مجهزة بنتي بـ 80 ألف جنيه وجهازها اتحرق، عشان ينتقم مني أنا وبنتي بسبب فسخ الخطوبة، عليا ديون كتير ولسة مسددتش اللى عليا، خطوبة بنتي اتفسخت أكثر من 4 مرات لسوء سلوكه، وبنتي مش قادرة تتحمل اللى بيعمله فيها.
مش هسيبك إنتي بتاعتي
وتابعت: في الآونة الأخيرة، شهدت مشادات وخلافات بين المتهم وخطيبته دنيا على إثرها قررت الانفصال عنه وفسخ الخطوبة وبالفعل تم إنهاء العلاقة والارتباط، وبعد ذلك فوجئنا بقيام المتهم بإرسال تهديدات لخطيبتة السابقة يقول مش هسيبك.. إنتي بتاعتي.
وكشفت والدة الفتاة أن المتهم أرسل مع شقيقها رسالة تهديد ووعيد بالقتل وأن يفعل بها على غرار ما حدث في نيرة أشرف طالبة جامعة المنصورة والتي لقيت مصرعها ذبحا وطعنا على يد زميلها أمام بوابة جامعة المنصورة.
وأكدت الأم المكلومة أنها مقيمة في شقة إيجار والنيران التهمت الشقة بأكملها والأثاث وغرفتي النوم والمعيشة وتفحم جدران الشقة بأكملها: جهاز بنتي والأجهزة الكهربائية اتحولت لخردة، فرحة عمري راحت.
وشهدت مدينة المحلة الكبرى بمحافظة الغربية نشوب حريق هائل في شقة، حيث انتقم المتهم من خطيبته السابقة وأسرتها بسبب فسخ الخطوبة، مما أسفر عن إصابة 3 أطفال أحدهم حالتة خطيرة في العناية المركزة والتهام النيران محتويات الشقة.
