عمر خورشيد: الفنان سلعة والطلب عليا مش كتير.. ومبعرفش أسعى وأخبط على باب الناس
تحدث الفنان عمر خورشيد عن سبب قِلة أعماله الفنية، مشيرًا إلى أنه صور 4 أفلام خلال الفترة الماضية ولم يتم طرح أي منها، بجانب الحديث عن إذا كان يشعر بأنه ظُلم فنيًا.
وقال عمر خورشيد، في تصريح خاص لـ القاهرة 24: الفنان سلعة وأنا مفيش عليا طلب دلوقتي، ومش معنى كدة إني مش شغال، لأن أنا شغال وكل سنة بعمل عمل، بقالي حوالي 5 سنين عملت 4 أفلام ومسلسل ولا واحد فيهم نزل، واحتمال المسلسل يكون نزل على منصة ولكن مفيش حد شافه ومحدش حس بيه، ده كان بطولتي اسمه وجع البنات.
وتابع: الأفلام لسة لغاية دلوقتي منزلتش، وأنا كممثل للأسف وظيفتي بتنتهي لما دوري بينتهي، فماليش علاقة بالتوزيع.
وأكد عمر خورشيد في تصريحاته، أنه لم يشعر بالظلم على المستوى الفني، قائلًا: ربنا موزع الأرزاق، وأشك إن في حاجة اسمها ظلم فني، هو الموضوع كله علاقات وأنا فاشل في ده.
وأضاف: الموضوع مالوش علاقة بالظلم الفني هو ليه علاقة إن أنا واحد مبعرفش أسعى وأخبط على باب الناس وأقول لهم شغلوني، ولكن لأ أنا مش حاسس بالظلم الفني أنا بشتغل وبقبض كويس جدًا.
عمر خورشيد
ويعتبر فيلم ماتيجي نرقص، الذي عرض عام 2006، من أبرز أعمال الفنان عمر خورشيد، والعمل كان من بطولة الفنانة يسرا، تامر هجرس، هالة صدقي، طلعت زين، عزت أبو عوف، سليمان عيد، والعمل من تأليف أسامة فهمي وإخراج إيناس الدغيدي.
