صافيناز في حوار جريء لـ القاهرة 24: رقصي مافيهوش إغراء والستات بيتحرشوا بيا.. وهعتزل الرقص لما أخلف
«أنا مميزة وكل الراقصات بيقلدوني.. إلى جانب أنني ممثلة وليا تاريخ في السينما ونجمة شباك، ورقصي لا يحمل إغراء، وسأعتزل الرقص بمجرد أن أتقدم في العمر، وإذا أنجبت طفلًا سأتفرغ لرعايته وأترك الرقص، وجمهوري من السيدات أكثر من الرجال، ولم أتعرض للتحرش من الرجال ولكني تعرضت بكثرة للتحرش من السيدات».. كان هذا جانبًا من حوار الراقصة صافيناز خلال حوارها مع القاهرة 24، والذي كشفت من خلاله أسرارًا عن عملها بمجال الرقص ورأيها في ارتفاع أجور الراقصات وغيرها من الأمور.
*ما تعليقك على ارتفاع أجور الراقصات الأجانب؟
مش كل الراقصات زي بعض ومش كلهم غاليين، والغلاء شيء طبيعي لأن البدل غالية جدًا، بتبدأ من 20 ألف جنيه، والمطربين أجرهم أعلى مننا بكتير، لو شوفتوا أجر المطربين هتعرفوا أن الراقصات أجرهن رخيص.
*ما الذي يميز صافينار عن باقي الراقصات؟
أنا مميزة لأن كلهم بيقلدوني وماحدش عمل حركة جديدة كله بيقلد حركاتي وبدلي، حتى كلمة بحبكوا يا حلوين، وأنا مش راقصة فقط أنا ممثلة، وليا تاريخ في السينما وأفلامي كانت بتنجح نجاحات كبيرة، وماحدش عمل اللي عملته، وبحضر فيلم جديد، وهيكون فيه مفاجأة جدًا، عندي تارجت أني هكمل في التمثيل، وأنا عملت 5 أفلام وكنت بطلة وكنت نجمة شباك، وأفلامي كانت بتنزل جمب غادة عبد الرازق وياسمين عبد العزيز وده شيء يشرفني وأكيد عندي سيناريو جاهز.
وبالنسبة لي أنا غالية ما ينفعش أكون مرمية في كل حتة، وأكتر الأماكن اللي برقص فيها مفيش فيها خمور لأنها بتكون حفلات عائلية، وأنا ما وصلتش للنجومية دي كلها علشان أتمرمط، وما ينفعش أرقص في أي حتة وأي حاجة وخلاص ومش كل يوم بشتغل وبتمرمط لأني نجمة.
* ما ردك على الانتقادات التي تتعرضين لها بسبب جرأتك؟
رقصي مافيهوش إغراء، وخلينا نقارن بين راقصات زمان ودلوقتي ونشوف الإغراء، ونشوف البدل اللي كانوا بيلبسوها من غير شورتات، إحنا على الأقل بنلبس شورت، لكن الناس بتشوف الجديد وينسوا القديم، مع إن القديم كان مفتوح وفيه إغراء أكتر.
*من أكثر الراقصات اللاتي ينلن إعجابك؟
من الراقاصات المصريات اللي بيعجبوني، راقصة اسمها سهر سمارة لأنها بروفشنال وبحب أتفرج على رقصها، وفيه راقصات أجانب كتير حلوين، لكن لوردينا تعجبني طريقة شغلها وبدلها.
*هل من الممكن أن تفكري في اعتزال الرقص؟
كلنا هنعتزل في يوم من الأيام وهنمشي من المسرح، لكن أنا همشي قبل ما أكبر مش هقبل جمهوري يشوفني وأنا كبيرة في السن، مش هقبل حد يقولي انزلي من المسرح يا حاجة، الواحدة لازم تقف على المسرح وهي حلوة حلاوة ما تقدريش تشيلي عينك منها، مش بس بترقص جامد لازم يكون عندها كل حاجة وشها ورقصها وكلها على بعضها، علشان تطلع على المسرح الجمهور ما يقدرش ينزل عينه من عليها ستات ورجالة، وأنا معروف عني أن جمهوري ستات أكتر من الرجالة.
*هل تتعرضين للمضايقات أو التحرش في حفلاتك؟
بدخل في شغلي معايا جارد شخصي، وحد شاطر وبروفيشنال، وبشتغل بفرقتي حوالي 25 فرد وكلهم رجالة كل دول واقفين في ضهري، ماحدش يقدر يفكر يقرب عندي، تاني شيء سبحان الله في مصر النظر على الراقصات مش أوي لكن أنا الحمد لله جمهوري ناس نضيفة جدًا 90 في المية منهم محترمين، وبيحترموني فوق الخيال وبيحبوني جدًا، وبصراحة ماشفتش من الجمهور إلا الاحترام، وعمري ما حصل أن حد عاوز يتحرش بيا أو حد مسكني من جسمي، وممكن يكون حظي حلو، وأنا بتكلم مع جمهور وبقول لهم كلنا هنتفرج وكلكم فوق دماغي، اتفرجوا بس، وبعرف أعمل كنترول في الأفراح والحفلات حتى لو فيه منهم مش محترم بيحترم نفسه، لأن ليا طريقة كده على المسرح.
*هل تعيشين قصة حب؟
عشت قصص حب، وماحصلش نصيب مش هقول هو كان وحش أو أنا كنت وحشة لكن مفيش نصيب، وفي يوم من الأيام لما أتجوز وأخلف هسيب الرقص وأعتزل لأني ما أقدرش أسيب ابني أو أجيب له خدامة، ومش هيكون عندي وقت وهخصص وقتي كله لابني وهعمل له كل حاجة بنفسي.
ما رأيك في عمليات التجميل.. وهل فكرت في الخضوع لها؟
عمليات التجميل كله بيعملها وشيء جميل، عندنا 99 في المية راقصات كلهم بيعملوا عمليات تجميل لأنها موضة، ممكن واحدة ولا اتنين مش عاملة لسه، لسه ما عملتش أي عمليات تجميل/ ساعات بيدور في دماغي لكني بخاف جدًا فوق الوصف، تقريبا مش هعمل علشان جبانة.
هل تعرضت للتحرش من الستات؟
كتير جدًا في السنوات الأخيرة وبقابل كتار أوي فوق الوصف، ما شفتش في حياتي تحرش من رجالة لكن شفت من ستات كتير وإحنا ستات زي بعضينا إيه المشكلة يعني خير.
