بركات للاعبي الأهلي: وجهوا اللوم لأنفسكم.. والدلع سبب التعادل مع فيوتشر
تحدث محمد بركات عن تعادل الأهلي أمام فيوتشر بهدف لمثله، في إطار منافسات مسابقة الدوري الممتاز هذا الموسم.
تصريحات محمد بركات
قال بركات في تصريحاته تلفزيونية: الهدف الذي سجله فيوتشر في شباك الأهلي هدف ميدخلش، وخطأ مشترك والجهاز الفني للأهلي مكانش يتوقع إن المباراة تتحول فجأة.
وتطرق بركات للحديث عن تسبب سعد سمير في ركلة جزاء لصالح الأهلي خلال مواجهة فيوتشر، قائلا: غريبة من سعد، لاعب كبير وعنده خبرات، وبرونو سافيو كان بعيد.
وأكمل: ظروف الماتش النهاردة، تخلي لاعيبة الأهلي تزعل وتلوم نفسها والنهاردة الأهلي بيقرب الزمالك تاني وبيضع الضغط على نفسه، وبقى في دلع، من خلال إحساس لاعيبة الأهلي إنهم بيلعبوا قدام 10 لاعيبة الكورة بتحترم اللي يحترمها.
وواصل بركات: لدي تحفظ على لقطتين خلال المباراة، كان هناك تدخلا عنيفا على علي معلول داخل منطقة الجزاء، وكان لابد أن تتم مراجعة تقنية الفيديو بالشكل الأمثل.
وأضاف: هناك أيضا تدخل عنيفا من لاعب فيوتشر على قدم عمرو السولية كان يستوجب تدخل تقنية الفيديو.
وأشار: أفشة شاط ركلة الجزاء بناء على ايه؟ هل اللاعيبة بتجامل بعض في الملعب؟ هل معلول بيجامل أفشة ولو معلول هو اللي بيجامل أفشة تلوم على معلول بخبراته الكبيرة وكم المواقف.
وأعرب: مفيش مجاملة على حساب الفرقة، عايز تجامل جامل وأنت ضامن النتيجة، ولما الماتش يبقى في وقت حاسم تديله الكورة عشان يشوطها، مينفعش، ومع احترامي كان لازم كولر يتدخل، أفشة مراحش شاط على طول كان في فترة قبل ما يشوط كان كولر المفروض يتدخل ويمنعه.
واختتم حديثه: ضربة الجزاء اللي يشوطها رقم واحد في اللاعيبة مديهاش لحد تاني يشوط.
