زيزي عادل: ربنا قالي كفاية هزار وسيبي الفن.. واكتشفت إني مش هاخد الأغاني أقابل بيها ربنا
كشفت الفنانة المعتزلة زيزي عادل حقيقة زواجها من داعية إسلامي وإقناعه لها بالاعتزال، بجانب الحديث عن الزواج وعلاقة الرجل بالمرأة.
وقالت زيزي عادل خلال لقائها مع الإعلامية ياسمين عز في برنامج كلام الناس: قالوا إني اتجوزت داعية وهو اللي أقنعني أعتزل وأنا معرفش ليه بيجوزوني كتير كدا، ودي بشرة خير ويا رب أتجوز بس دا مكنش حقيقي والاعتزال مكنش ليه علاقة بالارتباط أو الجواز.
وواصلت زيزي عادل: قرار اعتزالي من عند الله، وحسيت كأنه بعتلي وقالي سيبي الفن وحاجة بتحصل بدون وصف وكأن ربنا بيقولي كفاية هزار تعالي بقى ونعمل للي جاي، ومش صح الست تتحجب عشان زوج لأنه هيكون عن عدم اقتناع.
كما تطرقت زيزي عادل للحديث عن الزواج ورأيها في حالات الطلاق المنتشرة، قائلة: أنا شايفة إننا نسيب الست تعمل اللي حاساه ولو عندك قابلية تسامحي الراجل لو ضايقك تمام، إنما مينفعش نقول لها لو عملك حاجة سيبيه وإوعي تتنازلي واتطلقي، ولو الراجل ضايقك واعتذر ارجعيله وبردو مينفعش تاخد فوق دماغها وتسكت وبمجرد ما يجي يقول أنا آسف ويجيب حاجة بسيطة بنرجع عادي وكل الناس عايشة كدا أنا مش بقول كلام من الفضاء، ولو كل حاجة هتاخديها على كرامتك البيوت هتتخرب.
وسبق أن كشفت زيزي عادل أسباب اعتزالها الفن، قائلة: أنا اكتشفت إني هاخد معايا أعمالي وبدأت أفكر إني مش مستعدة أقابل ربنا بـ حياة المطربة، وكنت عايزة أحس إني مستعدة أقابل ربنا لأن محدش صغير على الموت.
