ياسمين عز: خافي على جوزك من صاحبتك اللي ملهاش كبير.. وبلاش تتريقي عليا لما بحذرك
وجهت الإعلامية ياسمين عز عددا من النصائح للسيدات بشأن التعامل مع صديقاتهن، مؤكدة أن جميع نصائحها مبنية على أسس دينية.
وقالت ياسمين عز في برنامجها كلام الناس: جوزك لو اتساب مش هيتجاب وبلاش تتريقي عليا لما بقولك صاحبتك هتسرقه منك، إيه موضة تحكي لصاحبتك أسرارك دي؟ أنتوا بتدعوا لدين جديد؟ حرصي على جوزك وأعملي الصح معاه وحاوطي عليه ولو مزنوقة في كلمتين فضفضي له لأنه هيهز راسه وهينسى وبلاش تثقي في صحباتك.
وواصلت ياسمين عز: كلامي دا لكل البنات وأي واحدة صاحبتها سرقت جوزها منها ومش بخصص حد معين، وبقولك أشغلي نفسك بجوزك ومتقوليش أسرارك برا، وصاحبتك اللي بنت أصول ولها كبير وعندها أب يقطم رقبتها ميتخافش منها ودي استثناء لأنها هتخاف إنما فيه صاحبات تانيين بتكلم عنهم.
وأضافت ياسمين عز: بلاش الثقة المفرطة في صديقاتك وأنا حذرتكم وقولت لك اعملي حدود للصداقة مع الكل وحياتك مع جوزك متكونش مشاع للجميع، وبقول كدا بناءً على الدين لأن مينفعش حد يختلي بحد وأنتوا بتكئبوني لأني مش بنظر عليكي وشوفنا أنه بيحصل أهو، ولازم تعملي الصح مع جوزك.
كما سبق وعلقت ياسمين عز على الهجوم التي تعرضت لها الفنانة نادية الجندي بعدما ظهرت بإطلالة شبابية، قائلة: نادية الجندي بنتنا ولازم ندعمها وسنها إيه اللي تحترمه؟ المفروض نشجعها لأنها بتهتم بنفسها ومحافظة على جمالها وجسمها ونشوف عملت إيه ونعمل زيها.
