المأذون المزيف ياسر القرشي.. شخص يروي قصة صادمة: اديته ألفين جنيه وقطع ورقة طلاقي| صور
أثارت واقعة المأذون المزيف ياسر القرشي الذي ينصح المقبلين على الزواج بالتعجيل في عقد قرانهم قبل صدور قانون الأحوال الشخصية الجديد، والذي من المقترح دفع اشتراك لـ صندوق رعاية الأسرة، ردود أفعال رواد مواقع التواصل الاجتماعي، ما بين مؤيد ومعارض، الأمر الذي جعل زوجا يروي قصة صادمة معه بعد خلافه مع زوجته وطلبت الطلاق.
رواية صادمة لأحد الأزواج مع المأذون المزيف ياشر القرشي
بعد انتشار أخبار القبض علي المأذون المزيف، تداول أحد رواد مواقع التواصل الاجتماعي فيسبوك يدعى كريم، يعمل محاميا، متزوج قصة حدثت مع المأذون خلال خلافات أسرية بينه وبين زوجته: المأذون اللي كاتب يلا عجلوا بالزواج قبل رسوم الصندوق أعرفه كويس، ده صديق شخصي، بداية معرفتي بيه صاحي من النوم لا بيا ولا عليا لقيت المدام بتقولي طلقني، طيب فيه إيه هو أنا ضايقتك في الحلم مثلا؟، قالت لا هو كده ويلا لازم ننزل للمأذون دلوقتي، يهديكي يرضيكي مفيش حل.. المهم قولتلها طب هنزل أجيب حاجة من العربية وكلمت المأذون ده قولتله بص إحنا هنيجي هتقولها يابنتي ده أبغض الحلال والكلمتين دول وتبوظ الموضوع.
وتابع الزوج: رحنا أول ما دخلنا هات يا ابني بطاقتك وإنتي بطاقتك، وأنا طلعت بطاقتي مش مدي خوانة، وهوب بدأ يكتب وشغال الله ينور، وأنا طبعا في سري بتمتم بشوية كلمات من اللي قلبك يحبهم، بعدين قولتله طب ما تيجي بره في كلمتين يا مولانا أعرف أتعابك كام، طلعنا أنا وهو بره فبقوله ده اللي اتفقنا عليه؟، قالي ما هي مصممة قولتلة هي لحقت تقول السلام عليكم حتى، قالي طب خلاص أخد أتعابي ألفين جنيه، بصتله كده وقولتله ماشي اتفضل، المهم دخل تاني وقالها إيه يا بنتي الاستعجال في خراب البيوت ده؟، دا إنتي معاكي راجل جوهرة وأدي الورق اهو وراح مقطعه، طبعا وانا قاعد قعدة عادل إمام لما دخل الجامع في فيلم مرجان أحمد مرجان التقوي بتشر من وشي.
وأكمل الزوج: المهم بعد شهرين كلمته تاني قولتله فيه ناس صحابي هيتجوزوا وعايزين مأذون تاخد كام؟، قالي 5 آلاف قولتله أمين، راح وكلمني قالي إيه يا باشا دول ساكنين في قصر ده 5 آلاف قليل أوي، قولتله خلاص إحنا اتفقنا معاهم، فقالي حاضر علشان خاطرك وفعلا كتب الكتاب، وخلص وبيسأل على فلوسه فالناس بلغته الفلوس معايا، راح مكلمني معاك الـ5 آلاف، قولتله أه بس ناقصين ألفين بتوع الاشتغالة فاكرها، أنت حبيبي ومولانا وفضيلتك وكل ده على دماغي لكن تشتغل محامي لا عيب عليك.. مش أنا.
يذكر أنه بدأت واقعة المأذون المزيف بدأت بمنشورات لصفحة باسم المأذون الشرعي، يقوم بالتدوين عليها شخص يدعى الشيخ ياسر القرشي، كتب بعض المنشورات ونشر صور بقيامه بتوثيق عقود زواج مدعيًا عمله مأذونًا، ويدعو المواطنين للزواج قبل صدور قانون الأسرة الجديد حتى لا يدفعوا ثلاثين ألف جنيه للصندوق.
القصة الكاملة لواقعة المأذون المزيف
وفحصت وزارة العدل المنشورات والصفحة وتبين أنه لا يعمل مأذونا شرعيا، وأنه يباشر أعمال المأذونية بالتوثيق دون سند من القانون واللائحة، وأنه يباشر أعمال المأذونية على الوثائق الخاصة بمأذون يدعى محمد محمد درويش مصطفى مأذون شرعي ناحية الفوالة جنوب القاهرة، بمساعدة الأخير له عن طريق إمداده بوثائق الزواج والمستندات، وتفويضه في ذلك بالمخالفة للائحة المأذونين.
حررت وزارة العدل مذكرة بالواقعة وإحالتها إلى النيابة العامة، لتولي التحقيق لما نشره على مواقع التواصل الاجتماعي من رسائل غير حقيقية تحمل شائعات مغرضة.
وفيما يخص المأذون محمد محمد درويش مصطفى، فقد عرض ما نسب إليه على محكمة أسرة عابدين والتي أمرت بإيقافه عن العمل وسحب دفاتر الزواج والطلاق منه.
وقررت محكمة أسرة عابدين إيقاف المأذون محمد محمد درويش مصطفى، عن العمل وسحب دفاتر الزواج والطلاق منه والتحقيق مع مساعده ياسر القرشي بسبب نشرهما منشورات على فيسبوك لحث المواطنين على الزواج قبل صدور قانون الأحوال الشخصية الجديد حتى لا يدفعون 30 ألف جنيه للصندوق.
