وفاء مكي: هعتصم في النقابة لحد ما يشوفوا حل.. فاض بيا ومش قادرة استحمل
تحدثت الفنانة وفاء مكي، عن تفاصيل معاناتها من الظروف المعيشية في ظل عدم عرض أعمال فنية عليها.
وقالت وفاء مكي في لايف مع القاهرة 24: خدت سلفة من نقابة المهن التمثيلية وعليا وصلات أمانة، وعارضة شقتي للبيع وهبقى أعيش في شقة إيجار جديد، وهعمل اعتصام في النقابة وهضرب عن الطعام لحد ما يشوفوا لي حل بطريقة حلوة ومشرفة.
وأضافت وفاء مكي: فاض بيا ومش قادرة استحمل، بقى لي 10 سنين عليا ديون بـ 500 ألف وأمي ست عيانة وفي حالة خطر وعندها كانسر في الأمعاء، وعندي التزمات وخدت قرض، وعايشة على معاش والد ابني 3 آلاف جنيه في الشهر والقرض بيتم سداده على 31 شهر لمدة سبع سنين، واللي بيتبقى بجيب به احتياجات البيت.
وواصلت وفاء مكي: أنا عاوزة أقف على رجلي وأكل لقمتي بعرق جبيني، شوفوا أنا كنت إيه ومش محتاجة يرموا لي أي حاجة ومينفعش أقل عن المستوى.
طلعت غبية ومعملتش حساب الزمن
واستكملت وفاء مكي: أنا رغم اللي بيحصلي لي لكني بحب مهنة التمثيل، ولكني طلعت غبية ومعملتش حساب للزمن، وهفضل أعمل استغاثة بالمسؤولين
أعمال وفاء مكي
ويُشار، إلى أن وفاء مكي بدأت مشوارها في الثمانينيات من خلال أدوار صغيرة في فيلمي البنات والمجهول، والجمالية، وكانت بداية انطلاقتها الحقيقية: مسلسل الراية البيضا في دور سمحة عبده الشاطر، وفي التسعينيات شاركت في عدة مسلسلات منها: بنت سيادة الوزير، بوابة المتولي، حارة المحروسة، سعد اليتيم، افتح قلبك، وحققت شهرة كبيرة من خلال مشاركتها في مسلسل ذئاب الجبل بدور مهجة الفتاة الصعيدية، وفي فترة الألفية شاركت في عدد من المسلسلات منها: إحنا نروح القسم، حواري وقصور، عواصف النساء، وعد الحر، ساعة عصاري.
ومن أعمالها في المسرح: الكنز في البدروم، دقي يا مزيكا، سعدية ورايا ورايا مع الراحل سمير غانم، وفي السينما شاركت في فيلم لحم رخيص، وضد الحكومة الذي حققت من خلاله نجاحًا كبيرًا بدور خواطر.
