رانيا يوسف: أنا وميسي بينا أصدقاء مشتركين.. وممكن أسامح الراجل في النزوات
كشفت الفنانة رانيا يوسف، رأيها في لاعب الكرة الشهير ميسي، مؤكدة أنها تتمنى نماذج مثله في مصر، بجانب الحديث عن الخيانة والنزوات وقرار انفصالها.
وقالت رانيا يوسف في تصريحات تلفزيونية: أنا بحب ميسي كـ زوج وراجل لأن كان عنده مشاكل صحية وبيتعالج لكنه تغلب عليها ومازال متواضع، والأصدقاء المشتركين بيننا بيقولوا أنه محترم، وبغير لأنه شايف مراته كـ روح مش شكل، ليه معندناش النموذج دا في مصر؟
وواصلت رانيا يوسف: أنا ممكن أسامح الراجل في النزوات اللي بدون مشاعر لو فيه بيت وأطفال ورصيد من الحب، وفيه نزوات ومفهاش مشاعر لو له رصيد وفيه بيت وأطفال ممكن أسامح لو ندمان والموضوع تافه، وبنتي فوقتني في أول جوازة ليا وقالت لي مش بتضحكي خالص يا ماما؟ والكلمة دي وجعتني وحسيت إني مش قادرة أمثل إني سعيدة وقررت أنفصل.
وأضافت رانيا يوسف: الست لما بتعمل حفلة بتكون موجوعة بس عايزة تبين العكس وبنكون مكسورين أوي، ومفيش ست وراجل بينفصلوا بعد عشرة دا أنتي لما بتربي قطة وبتروح منك بتتوجعي مش معقول مش هتتأثري، والراجل بيتوجع بعد فترة من الانفصال وبيكتشف أنه بيضيع ست كويسة.
واستكملت رانيا يوسف حديثها: كنت أتمنى أكون مدلعة، ولكن الدلع عيب بردو لأن لو الشخص اللي معتمدة عليه دا راح الدنيا هتقع، عانوا معايا كتير في جوازاتي، وأنا كنت محاربة وبنتي الكبيرة قالت لي أنتي عقدتيني من الناس يا ماما، وكلمة وجعتني لأني غلطت كتير واتجوزت 3 مرات.
