حسينا إننا بنتعامل مع تباعين في موقف.. مواطنون يشكون من سوء المعاملة في مركز حاتم نعمان
نشر عدد من مستخدمي موقع التواصل الاجتماعي على جروب "ضحايا الدكتور حاتم نعمان" تجاربهم في تلقي العلاج من خلال المركز المملوك للطبيب مقدم البرامج الطبية على عدد من المحطات الفضائية.
مواطنون يشكون من سوء التعامل في مركز حاتم نعمان
وأكد العديد من المستخدمين تعرضهم لعمليات نصب من الطبيب الشهير والعاملين معه في المركز المملوك له والذي يشهد إقبالا كبيرا من المواطنين بفعل الدعايا الكبيرة التي يقوم بها الطبيب، إلى جانب ظهوره بين وقت وآخر على شاشات التليفزيون.
أحد المستخدمين قال في تدوينة: "اتفقت معاه وعملت الجلسات بألوف الجنيهات وجسمي بقى زي اللي ممسوك بيسرق جزم في جامع يوم العيد من الكدمات والسحجات، وبعد ما خلصت مابعتليش البرنامج ولا النظام العلاجي والغذائي اللي اتفقنا عليه، ضحايا الدكتور حاتم نعمان لازم نحافظ على الصفحة دي ونكتب عليها علشان ننقذ الضحايا الجدد..
وأضاف: "والعاملين مايتخيروش عنه حسيت اني بتعامل مع تباعين في موقف أرياف مش مركز في أرقى مكان في مصر، ولما سألت الناس في دبي قالولي إن العلاجات دي تم تنفيذها غلط وإن الحقن اللي تحت الجلد دي اتوقفت لخطورتها".
فيما قال: "حسبنا الله ونعم الوكيل فيه.. آخد من يدي 105 آلاف والله العظيم بدعي عليه في كل سجدة وربنا يتولانا برحمته"، وكتب آخر: "أنا هربت بعد أول جلسة حسبي الله ونعم الوكيل".
بينما نشر آخر تدوينة قال فيها: مفيش نتيجة نهائي من الجلسات هل طبيعي أن بعد ما تخلص الجلسات وياخد فلوس المتابعة كمان يقوللي مافيش ميعاد، وهل يعقل إن مريض يتساب بال 3 شهور من غير متابعة، واشمعنا طول ما الجلسات شغالة والألوف بتندفع المواعيد كانت زي الساعة ولما طلب فلوس لجلسات تاني، وأنا رفضت قالي مافيش مواعيد للمتابعة".
وأضاف: "المتابعة عنده مابتاخدش اكتر من 10 دقايق.. مش عارف يوفرها 3 شهور ممنوع أي حد يتواصل معاه.. في دكتور في الدنيا ما بيكلمش المرضى بتوعه".
فيما نشر مستخدم: "حسبي الله ونعم الوكيل دكتور فاشل عملت عنده جلسات لابني دفعت 12 ألف جنيه غير العلاج، وبعد لما خلصت جلسات أنا مش شايف نتيجة، يقولي لا ابنك خس طيب فين مفروض يبان عليه".
وأضاف: لقيته طالب مني جلسات تاني 12 ألف جنيه ولما رفضت وطلبت أقابله رفض إلا لما أعمل الجلسة، روحت تاني وطلبت أقابله قالولي إنه مسافر وأنا دافع تمن المتابعة لابنى ربنا ينتقم منه، حسبي الله ونعم الوكيل أنا معايا الورق كله بتاع المتابعة والجلسات.
