عمري ما قدمت تنازلات والفنانات بيغيروا مني.. أبرز تصريحات الفنانة عنبر في كلام الناس
حلت الفنانة عنبر، ضيفة على الإعلامية ياسمين عز، في برنامجها كلام الناس المذاع عبر شاشة قناة MBC، وتحدثت خلال اللقاء عن تفاصيل مشوارها الفني وحياتها الشخصية.
ونستعرض لكم أبرز تصريحات الفنانة عنبر في برنامج كلام الناس:-
- أنا ضحيت بـ أمومتي عشان أمي لأنها ضحت بحياتها عشاني دي أقل حاجة أعملها ليها، ده رزقي في الحياة وأنا راضية بيه والمهم إني مقصرتش في حقها، مكنش ينفع إني أخلف لأنه كان هياخد من اهتمامي ورعايتي ليها، وهي كانت عندي أهم من إني أكون أم.
- كنا في مشوار بالعربية أنا وجوزي، وحد عاكسني وكنا في منطقة مقابر ونزل ووقف العربية وكان هيعمل كارثة وأنا خوفت يحصلنا حاجة خاصة إنها منطقة مقابر، وهو قالي لأ أنا مقبلش إن حد يتعدى كده وهو بيغير عليا جدًا.
- الغيرة شيء جميل إن الراجل يغير على الست اللي مرتبطة باسمه ولكن اللي بتزيد عن حدها بتبقى وحشة، وخاصة في مهنتنا لأنها مرتبطة بعلاقاتنا بالآخرين.
- ربنا عوضني عن حرماني من الأمومة بحب الناس وأصحابي وجوزي والناس اللي بتحبني، وأكيد كان نفسي أكون أم لأني بحب الأطفال جدًا، ولكن هي كانت أهم من أي طفل في العالم.
- أتمنى أن ربنا يجعل رعايتي لـ أمي في ميزان حسناتي ويعوضني خير وكل شيء نصيب، وربنا يجعل كل مرضها في ميزان حسناتها، وفداها الدنيا وما عليها والحمد لله إن ربنا قدرني إني أكرمها لغاية ما وصلتها لـ مثواها الأخير.
- عمري ما قُلت إني قدمت تنازلات في بداية مشواري الفني، ولكني تعرضت لضغوط وتعرضت لحاجات كتير و أي فنانة بتدخل الوسط، واتعاملت معاها بشكل عنيف، لأني بحترم ربي وبحترم نفسي وأهلي.
- لو التنازلات هي السبيل للنجومية والشهرة فأنا مش عايزاها.
- في إحدي المسلسلات زمان في بداياتي كان في مشهد بيني وبين نجمة كبيرة قالتلي أبص عكس الكاميرا، ولما جه وقت التصوير صورت صح وبكيت بعدها لأنها مساعدتنيش وموجهتنيش للصح، والمخرج شريف يحيى تفاجأ من اللي حصل وقالها تعتذر لي.
- حصل غيرة من نجمات أخريات اضايقوا مني وكانوا عايزني أغير لبسي في المشهد أكتر من مرة، وكان في مسلسل كبير جدًا وفريق العمل كان كبير، وساعات بقول ليه ده إنتي نجمة كبيرة وأنا أصغر منك المفروض تساعديني.
- لما اشتغلت مع النجوم الرجال كانوا بيدعموني ولو اترشحت في عمل كانوا بيتبسطوا جدًا، وكان فيه نجمات بردوا كويسين ووقفوا معايا.
- مهما كانت مكانة الست الاجتماعية حتى لو بقت وزيرة فالراجل هو الراجل، والراجل بيحب يحس برجولته ويحس بكيانه وإنها ست البيت بغض النظر عن مكانتها في المجتمع.
