المطربة هدى: بيمر عليا وقت مش معايا مليم.. ومش بلاقي فلوس أدفع مصاريف مدرسة بنتي
كشفت المطربة هدى تفاصيل مرورها بعدة أزمات مادية في حياتها، مشيرة إلى أنها تنتج الأغاني بنفسها، بجانب الحديث عن رأيها في مشاركة الزوجة في مصاريف المنزل.
المطربة هدى
وقالت المطربة هدى خلال لقائها مع الإعلامية ياسمين عز في برنامج كلام الناس المُذاع عبر شاشة إم بي سي مصر: أنا بيتقال عليا إني زي المطرب حكيم ولكن النسخة النسائية ودا شرف ليا، ولكني اتعطلت في مسيرتي الفنية لأني بنتج الأغاني لنفسي وبمر بأزمات مادية زي كل الناس.
المطربة هدي : مش معايا فلوس
وواصلت المطربة هدى: بيمر عليا وقت مش بيكون معايا مليم ولا فلوس أدفع الدرس لبنتي ومصاريف المدرسة ولو حد من برا وشاف إني عايشة في بيت كويس ومعايا عربية كويسة مش هيصدق إني مش معايا فلوس.
كما تطرقت هدى للحديث عن واجبات وحقوق الزوجات، قائلة: الحياة الزوجية مشاركة ولكن مينفعش الزوجة تشيل الكفة الأكبر وممكن تساعد بشرط زوجها يكون شايلها ومعاها وهما سند لبعض إنما مينفعش يكون عالة مبيعملش حاجة.
وأضافت هدى: الدنيا كلها ذكور بس مين الراجل؟ ومع الأسف الأغلبية عايزين الستات يصرفوا عليهم، وأنا اتربيت في بيت بيحترم الراجل وبيقدره بس مينفعش الراجل ميقدرناش ومفيش معاملة حلوة ينفع نقابلها بشكل وحش وجزمة الراجل على دماغي لو كان سند وضهر، والست سندها يا فلوسها يا راجل محترم.
وسبق أن كشفت هدى عن أمنيتها في 2023، وقالت في تصريحات تليفزيونية سابقة إنها تتمنى تأدية العمرة وتقديم ديو مع المطرب حكيم.
