الموسيقيين عن فرض 25 ألف دولار رسومًا على أوركسترا الشباب الإيطالي: مش جايين سياحة
نفى الدكتور محمد عبد الله المتحدث الرسمي باسم نقابة المهن الموسيقية، فرض النقابة مبلغ مالي قدره 25 ألف دولار كرسوم لحفل أوركسترا الشباب الإيطالي، والذي كان سيقام في معبد الأقصر بمشاركة حفيدة الفنان عبد الرحمن أبو زهرة.
وقال الدكتور محمد عبد الله المتحدث الرسمي لنقابة المهن الموسيقية، في تصريح خاص لـ القاهرة 24: الناس خدت الكلام وبتقول نقابة المهن الموسيقية بتضرب السياحة في مصر، عمر النقابة ما كنت كده، وكلنا كأعضاء النقابة والنقيب مستائين جدًا من بعض الألفاظ اللي إحنا متحفظين عليها، ومنها ضرب السياحة، والنقابة عمرها ما تضرب السياحة.
وتابع الدكتور محمد عبد الله: أي حاجة خاصة بالسياحة إحنا نخدمها علشان خاطر بلدنا، ونقابة المهن الموسيقية خادمة للدولة المصرية، كل الموضوع إن فيه 52 عازف أجنبي جايين يشتغلوا في مصر حرفيًا، والعازف اللي جاي من بره مش جاي ببلاش، هو واخد أجره، هو جاي يمارس عمل في مصر، فالطبيعي الدولة اللي مستضيفاهم تتحصل منهم على مبلغ.
الموسيقيين: أي أجانب على أرض مصرية بيدفعوا
واختتم الدكتور محمد عبد الله: هذه قوانين وضعتها وزارة التضامن الاجتماعي، وقوانين نقابة المهن الموسيقية أيضًا، إن أي أجانب على أرض مصرية بيدفعوا عادي جدًا، ودول مش ناس هيزوروا الهرم ويركبوا جمل، السايح بيدفع فلوس مش بياخد فلوس، والعازفين دول واخدين فلوس من الجهة اللي جايباهم، وفي فرق بين الفيزا في المطار، في فيزا عمل وفيزا سياحة.
