صاحبي هو كلبي والحيوانات أحسن مننا.. أبرز تصريحات ياسمين نيازي في برنامج كلام الناس
حلت المطربة ياسمين نيازي، ضيفة على الإعلامية ياسمين عز في برنامجها كلام الناس، المذاع عبر شاشة قناة MBC مصر، وتحدثت خلال اللقاء عن تفاصيل حياتها الشخصية ومشوارها الفني.
ونستعرض لكم أبرز تصريحات ياسمين نيازي في برنامج كلام الناس:
- ممكن أكون انطوائية بسبب إني تعبت أوي في الشغلانة دي مشاكل ونفسيات كتيرة مع إني بدأت صغيرة.
- أنا مشاغبة في رومانسيتي، ومش بكمل في علاقاتي لأني على قد ما بحب أوي بزعل أوي، ومش بسامح بسرعة وده عيب فيا، أنا بسامح بعد كده ولكن مش بنسى المواقف.
- أغنية قليل الحيلة وش السعد عليا، ولغاية دلوقتي بحارب نفسي عشان أعمل حاجة أجمل منها، بحاول أعمل أغاني جديدة بتوزيعات أجدد، ولكن لغاية دلوقتي الناس بتحبها وبتطلبها، هي لعنة حلوة.
- أنا طفشت عريس واحد بس لأنه عمل حاجة استفزتني ولكن يمكن نيته إنه هيدخل البيت من بابه، ورفضته عشان كلم ماما قبل ما يكلمني وقالتلي ده بيخاف منك أنتي ليه بتعامليه كده؟
- كنت في علاقة خطوبة قبل كده وكنت بحب جدًا ولكن بعد العشرة لقيت نفسي مش مرتاحة، هو كان عايزة مشاعر أنا مش هقدر اديها له.
- جالي التهاب أعصاب طرفية بسبب زعل وما زلت بتعالج منه، والتعب ده لما جالي كان مفاجئ ومكنش فيه أي حاجة مرضية عندي، والدكتور قالي إنتي صغيرة مش معقول تضغطي على نفسك لدرجة إنك تبقي مش قادرة تمشي.
- صاحبي هو كلبي، ومرة تعبت وجالي التهاب في الأعصاب الطرفية ومكنتش بمشي، وكنت على سريري وكلبي نايم تحت ورافع رأسه مستني أخف.
- ربنا خلق الحيوان لتوازن الكوكب، تعالوا نحاول نحبهم ونعيش مع بعض وهما أحسن مننا بكتير عندهم قلب.
