شكلي متغيرش من 20 سنة وممكن أمثل وأنا محجبة.. أبرز تصريحات صفاء جلال
تحدثت الفنانة صفاء جلال عن كواليس مسلسل جروب العيلة، الذي عرض مؤخرًا وحقق نجاحًا كبيرًا، كما تطرقت للحديث عن بناتها وعدة موضوعات أخرى في حياتها الشخصية والمهنية.
أبرز تصريحات صفاء جلال
ونستعرض في هذا التقرير أبرز تصريحات صفاء جلال التليفزيونية:
-لقائي مع سميحة أيوب وحنان سليمان لـ المرة التانية في مسلسل جروب العيلة، بعد تعاوننا في الضوء الشارد، كان لقاء جميل وممتع جدًا.
-كنا بروح نصور جروب العيلة، ونستفيد من خبرات سميحة أيوب والممثلين الشباب كانوا يجننوا.
-السوشيال ميديا مأثرة علينا بشكل بشع، فبحاول مع بناتي إن يكون عندنا وقت نتجمع فيه مع العيلة، عشان نحافظ على العلاقات الإنسانية.
-في ناس بعتولنا بعد عرض المسلسل إنهم عملوا جروب للعيلة بتاعتهم.
-سميحة أيوب لسه عندها نفس الالتزام، وحفظ المشاهد زي زمان، في الضوء الشارد.
-معرفش مين اللي طلع إشاعة اعتزالي للفن أنا موجودة بس لما بيجيلي عمل بنزل أصوره وأرجع البيت؛ لأني مش قوية في التواجد في المناسبات والاحتفالات الفنية.
-أنا بحب التمثيل وعمري ما هعتزل.
-سلمى بنتي بتدرس إخراج في معهد السينما قسم رسوم متحركة، وميولها للأفلام القصيرة والوثائقية أكتر من التمثيل.
-معنديش مشكلة مع عمليات التجميل البسيطة اللي بتخلي النفسية أحسن، زي شد البطن أو كبسولة المعدة.
-متمناش إن بناتي يشتغلوا في الفن لأن المهنة صعبة جسمانيًا ونفسيًا وماشية ببركة ربنا.
-الزعيم عادل إمام قال لي قبل كدة إن الضحك هو علاج الاكتئاب، ومفيش حاجة في الدنيا تستاهل إن الإنسان يكتئب عشانها.
-اتشتمت أنا وسلمى بنتي لما طلعت معايا في مسلسل سابع جار، والناس قالت دي واسطة فـ قالتلي أنا هفضل ورا الكاميرا أحسن من قدامها.
-كارما بنتي الصغيرة عايزه تمثل وعلى طول بتعمل فيديوهات على تيك توك، بس مش هخليها تدخل في الموضوع غير لما تبقى في أولى جامعة وتقرر.
-مش برد على الانتقادات والشتايم اللي بتجيلي على السوشيال ميديا والناس هما اللي بيردوا بالنيابة عني، وبتضايق جدًا من التعليقات دي.
-بعمل بوتوكس وفيلر بس مش بغير شكلي، عشان كدة شكلي متغيرش من 20 سنة.
-أكتر جملة بحب أسمعها عن أدواري إن الناس تقولي إحنا بنحبك وبنحترمك.
-كنت محظوظة إني اشتغلت مع فؤاد المهندس ومديحة يسري وكمال الشناوي، والجيل الذهبي ده مش هيتعوض.
-المتعة في الشغل مع فؤاد المهندس إنه كان طول الوقت بيتكلم عن حب عمره شويكار، وعن أعماله معاها.
-نفسي أطلع الحج وبعدها اتحجب وممكن أمثل وأنا محجبة زي ممثلات كتير.
