المؤلف أحمد عاطف فياض: جسدت قصة حياتي بمسلسل بالطو.. وكنت خايف من الجمهور
تحدث الدكتور أحمد عاطف فياض مؤلف مسلسل بالطو، عن كواليس العمل بعد النجاح الكبير الذي حققه منذ بداية عرضه على منصة WATCHIT.
وقال أحمد عاطف فياض، خلال لقائه مع القاهرة 24، إن مسلسل بالطو هو تجسيد لـ يومياته في الوحدة الصحية التي عُين مديرًا لها بعد تخرجه من كلية الطيب مباشرةً، موضحًا: أول ما اتخرجت بقيت مدير وحدة صحية بموظفين أكتر من اللي في المسلسل، طبعًا مكنش عندي خبرة إدارية ومكنتش أعرف إيه هي الاجازة العارضة وكنت بمضي على مرتبات وشهادات ميلاد ووفاة، الموضوع ده كان كبير عليا أوي وعلى أي حد يتحط في الموقف ده.
وتابع مؤلف مسلسل بالطو: مواقف كتير أوي حصلتلي علشان مدير لوحدة صحية ومش عارف أي حاجة ودي فكرة المسلسل وأحداثه، وطبعًا في حاجات اتطورت دراميًا واتحط شخصيات بـ أبعاد معينة علشان الدراما.
وأكد أحمد عاطف مؤلف مسلسل بالطو، أنه مازال يمارس مهنة الطب، قائلًا: كنت رئيس وحدة صحية لمدة سنتين كتكليف، وبعد التكليف اتخصصت في مستشفى كدكتور عظام ومازلت أمارس مهنة الطب.
مؤلف مسلسل بالطو: خُفت الناس متحبش المسلسل وتكره حياتي
وتابع أحمد عاطف مؤلف مسلسل بالطو، أن منصة WATCHIT، هم من طلبوا تحويل كتاب بالطو لـ عمل درامي، موضحًا: WATCHIT هما اللي تحمسوا للكتاب وقالوا عايزين نحوله لـ مسلسل، والكتاب ده غالي عليا ومكنتش عايز أول تجربة ليا في الكتابة تبقى قصة حياتي علشان كنت خايف إن الناس متحبهوش فتكره حياتي.
وأضاف: أنا كنت بذاكر سيناريو مع نفسي وكنت حابب الموضوع من قبل ما يتعمل المسلسل بـ 4 سنين، ولكن كنت عايز أجرب كتابة سيناريو في مسلسل تاني وبعدين أعمل مسلسل بالطو عشان أكون اتعلمت حاجات وأعمله حلو، واتحطيت أمام أمر واقع إني أعمله.
واستكمل: المسلسل خد وقته في الكتابة، ومن أحلى الحاجات اللي WATCHIT عملتها إنها ادتني الوقت المناسب اللي تستحقه كتابة مسلسل، وأتمنى كل حاجة أشتغلها تاخد وقتها في الكتابة.
وأكد أحمد عاطف مؤلف مسلسل بالطو أنه لم يستعن بورشة كتابة لـ كتابة سيناريو المسلسل، قائلًا: لم أستعن بورشة كتابة في مسلسل بالطو، ولو كان WATCHIT سألوني من 4 سنين تكتب سيناريو المسلسل مكنتش هوافق لأني كنت هخاف، ولكن ذاكرت كتابة سيناريو ودلوقتي مش هقول لحد يكتب قصة حياتي.
