شيرين رضا: مينفعش تسمحي لجوزك يمد إيده على بناتك.. مش ذنبهم إنك جبتيهم الدنيا
وجهت الفنانة شيرين رضا رسالة للأمهات، تنصحهن فيها بعدم السماح لأزواجهن بأن يعنفون أولادهن، كما أوضحت رأيها في الفرق بين تربية الأولاد والبنات.
وقالت شيرين رضا خلال ندوتها في القاهرة 24: في أمهات بيسمحوا لأجوازهم يمدوا إيدهم على بناتهم.. وده مش مقبول، لما تخلفي وتجيبي طفل الدنيا، مش ذنبه إنك اختارتي تجيبيه، ولازم تحافظي عليه لحد ما يكبر، ومينفعش تسيبهم لأي حد يلطش فيهم.
أما عن الفرق بين تربية الأولاد والبنات، علقت شيرين رضا، قائلة: من المفترض البنات بيسمعوا الكلام أكتر، ومش هقدر أقول تربية البنات ولا الولاد أسهل بالنسبة لي؛ لأني عندي بنت في الحقيقة إنما في التمثيل بنكون أصحاب، هما بس قدام الكاميرا بكون أمهم.
شيرين رضا تتحدث عن كواليس مشهد ظهور والدها
وتطرقت شيرين رضا للحديث عن كواليس ظهور والدها الفنان محمود رضا، ضمن أحداث مسلسل وبينا معاد في أحد المشاهد، قائلة: مكنتش راضية ومعترضة عليه؛ لأن المشاهد بقاله 20 حلقة مثلًا بيتفرج عليا في شخصية نادية.
وأضافت: لما يظهر محمود رضا كدا هو كسر الشخصية، ورجع الجمهور لـ شخصية شيرين رضا، أنا أكيد عايزه أبويا بس عايزه أفضل نادية، ومكنش فيه تلفزيون قدامنا كان كاميرا.
واختتمت شيرين رضا حديثها كاشفة الفرق بينها وبين شخصية نادية، قائلة: أنا مش أم صارمة تمامًا وفيه مشاهد مكنتش عايزة أقول الكلام اللي فيه لأنه مش شبهي، وشخصية نادية لا تشبهني وأنا أمي مربتنيش كدا ولا ربيت بنتي كدا بس حبيت شخصية نادية بردو؛ لأنها حقيقية ومسكينة وبحترمها لأنها عرفت تربي بناتها وتاخد بالها منهم، ولما جت تختار بين بناتها وحبها اختارت بناتها.
