هبة السيسي عن أزمة فستانها في مهرجان القاهرة السينمائي: جالي اكتئاب.. ومكنتش أقصد التريند
تحدثت الفنانة هبة السيسي، عن أزمة فستانها في مهرجان القاهرة السينمائي الدولي بدورته الـ 44، مؤكدة أنها لم تسعَ للتريند ولم تقصد أن تخالف دريس كود المهرجان.
دريس كود مهرجان القاهرة السينمائي
وقالت هبة السيسي، عن أزمة فستانها في مهرجان القاهرة السينمائي، في تصريحات تليفزيونية: أنا نمت وصحيت لقيت كل القنوات بتكلمني والصحافة عن فستاني في مهرجان القاهرة السينمائي، الأول استغربت الموضوع ومكنتش اتفرجت على صوري على الريد كاربت، وبعد ما شوفتهم فهمت ليه حصل ضجة على الفستان، وأنا مش بحب التريند ومش بحب أبقى محط الأنظار، ولو بقيت تريند محبش أتحط في موقف يسيء ليا.
وأردفت هبة السيسي، بأنه تم تعديل الفستان قبل ارتدائه في المهرجان، ولكنها لم تُجرِ عمل بروفة على الفستان بعد التعديل، موضحة: الفستان لما قيسته في البروفة اتعمله تعديلات أنا مقسيتهوش تاني بعد البروفا والتعديلات، والتعديلات دي أن البطانة اتغيرات والكب بتاع الصدر اتغير، فعمل شكل تاني للفستان، وكان الفستان تحت الإضاءة بيّن كل التفاصيل.
هبة السيسي: مكنش مقصود إني أبقى تريند
وأضافت هبة السيسي، أنها أُصيبت بالاكتئاب بسبب أزمة فستانها في مهرجان القاهرة السينمائي، قائلة: تاني يوم المهرجان قعدت في البيت كان عندي اكتئاب وزعلت ومحضرتش فعاليات المهرجان، وتالت يوم روحت لقيت صف طويل عريض وأكتر من 100 صحفي واقفين عايزين يعملوا معايا لقاء، وقدمت اعتذار لـ رئيس المهرجان الأستاذ حسين فهمي.
واختتمت هبة السيسي، قائلة: لفت الانتباه حلو ولكن مش بالشكل ده وإن الناس تقول إني حطمت الدريس كود، لأ ده مكنش مقصود أصلًا إني أبقى تريند، والناس صدقوني لما اعتذرت علشان دي الحقيقة.
