بشرى: المنتج زمان كان إنتاجه من جيبه لكن دلوقتي بقينا عبيد للمنصات
علقت الفنانة بشرى على تصريحات الفنانة نبيلة عبيد، خلال ندوتها بمهرجان أسوان السينمائي الدولي لأفلام المرأة، بشأن دور المنتجين في مشوارها الفني، إذ أفادت بأن هناك منتجين آمنوا بموهبتها ودائمًا كانوا يقودون المغامرة معها، من أجل تقديم عمل مختلف، يبرز موهبتها بشكل أكبر، عكس الوقت الحالي، حسب قولها.
وقالت بشرى، خلال الندوة: أنا دمعت من حزني على حالنا، شوفت جمال ورقي نبيلة عبيد وهي بتحكي عن جمال المشوار، وإن إزاي في ناس عندهم وعي ومثقفين، مش في ناس بيحاولوا يهدوا الفنان ويضربوه في ضهره زي ما بنشوف.
وتابعت: المنتج زمان كان إنتاجه من جيبه، دلوقتي إحنا عبيد للمنصات، هنخيط العمل ونظبطه على مقاس اللي هيشتريه، زمان نبيلة عبيد اتعاملت مع مخرج أو منتج عايز ينتج لـ نبيلة، دلوقتي بقا مولد وصاحبه غايب.
ندوة نبيلة عبيد بمهرجان أسوان
ومن جهتها، قالت نبيلة عبيد: سعيدة بالخطوات اللي أنا عملتها، كنت دايمًا بسمع للي قدامي هيقول إيه، وعمري ما كنت باخد القرار مني لنفسي أنا بتعلم، واشتغلت مع حلمي رفلة واتعاقدنا واتفقنا على فيلم وسقطت في بحر العسل، وإحسان عبد القدوس كلمني قالي اقرأي فيلم ولا يزال التحقيق مستمرًا، قُلت له أنا حابه اشتري الرواية دي.
وأضافت نبيلة عبيد: ومن هنا ابتديت بقى رحلتي مع إحسان عبد القدوس، هو اللي كان يرشحني لروايات كتير، وكنت بسمع الكلام عشان أتعلم وقرأت أيام في الحلال، والراقصة والسياسي.. والحمد لله كلها أعمال حققت نجاحًا كبيرًا.
