بسام رجب: كنت أول واحد يقعد على كرسي العرش بعد الملك فاروق.. وابنه قالي افتكرتك بابا
تحدث الفنان بسام رجب، عن كواليس شخصية الملك فاروق التي قدمها من قبل في أكثر من عمل، وروى تفاصيل لقائه بـ الملك أحمد فؤاد الثاني نجل الملك فاروق.
وقال بسام رجب في تصريحات لـ برنامج كلام الناس مع الإعلامية ياسمين عز، إنه سعيد بتقديم شخصية الملك فاروق في أكثر من عمل ومنهم فيلم ناصر، موضحا: عملنا المسلسل وصورنا في سرايا عابدين وكان عندي إحساس إني أول حد يقعد على كرسي العرش بعد 40 سنة بعد رحيل الملك فاروق.
وعن علاقته بـ الملك أحمد فؤاد الثاني، كشف بسام رجب قائلا: كان ليا صديق على صلة بـ الملك أحمد فؤاد الثاني، وقاله الملك أحمد أنه شاف المسلسل وشاف شخصية الملك فاروق وفكرني في البداية الملك فاروق الحقيقي، واتقابلنا أنا وهو في فرنسا وسألني على المسلسل ودا كان شيء جميل وسعيد باللقاء ده.
بسام رجب: أعمالي رحلة لذيذة
كما تحدث الفنان بسام رجب عن أعماله ووصفها بـ الرحلة، مؤكدا: أنا بشوف أعمالي رحلة لذيذة جدًا وسعيد بيها واستمتعت واستفدت بيها جدًا، و أنا مش مشغول بـ حاجة تانية غير التمثيل، بس مش في نقلة بتحصل في بعض الأوقات ذي إن جيل بيسلم جيل والتركيبة أتغيرت بس إحنا موجودين والمهم يبقى العمل اللي بقدمه كويس.
أعمال بسام رجب المقبلة
وكشف الفنان بسام رجب عن جديد أعماله خلال الفترة المقبلة، إذ أكد أنه يشارك في مسلسل الصندوق المقرر عرضه في السباق الرمضاني المقبل 2023، معلقًا: سعيد بالتجربة دي جدًا لأنها تجربة شبابي وأنا بمثل وسط الشباب الجداد وكلهم متميزين، وكمان المخرج شاب وكوني أبقى تحت قيادة مخرج شاب سعيد ببه جدا وهو المخرج مروان عبد المنعم، وهيقدم صورة جديدة ومختلفة، والمسلسل مفهوش ممثل سوبر ستار بس الموضوع والعناصر الجديد هيبقى عمل كويس.
وعلق بسام رجب على اختفائه عن الساحة الفنية في السنوات الماضية قائلًا: أنا شخصيًا متعود طول عمري من أول ما جيت من إسكندرية للقاهرة وبدأت أشتغل في التمثيل وأنا بفضل أني لو همثل هيبقى عشان الدور ده عايزني، أنما محبش حد يجاملني لأني مبسوط في حياتي ومش محتاج حد يجاملني.
وأردف: أهم حاجة الورق والسيناريو وطالما الورق كويس واشتغلوا عليه كويس هيبقى العمل هيطلع كويس، وأهم حاجة توفير الإمكانيات لأن الصناعة بتاعتنا مبنية على الإمكانيات عشان نقدر نحقق رغبات أو أفكار المخرج والمؤلف، وده بيتكلف كتير فلابد من توافر إمكانيات، وده لأن الشاشة هي اللي بتبين كل ده، فالكلمة هي المهمة، مع طبعًا مخرج كويس وكاست كويس.
