رضوى الشربيني لـ الرجال: قانون التحرش للجنسين وروح بلغ لو واحدة اتحرشت بيك
علقت الإعلامية رضوى الشربيني على رسالة أحد متابعي برنامجها هي وبس، يتساءل عن سبب مهاجمتها للرجال الخائنين.
وردت عليه رضوى الشربيني عبر برنامجها هي وبس، قائلة: كلنا عارفين إن الرجالة بتخون، يا أما فيه راجل فرفوش بيحب الستات، يا أما مبدأه التعدد، ولكن إنه يخون تحت ضغط دي أول مرة أسمعها، فلو فيه أي واحدة بتتحرش بيك، أو شربتك حاجة صفرا وبتضغط عليك بطريقة معينة، روح بلغ عنها وماتحطش نفسك تحت أي ضغط.
وأضافت: قانون التحرش مش للستات بس، للرجالة كمان، روح بلغ عنها وإحنا كلنا في ضهرك، وأوعى تتكسف على فكرة، لكن فكرة إن البحر يحب الزيادة فأحب أقول لحضرتك إننا في 2023 الحكاية بقت معكوسة عشان الرجالة بقت عاملة زي بوفيه الأكل المفتوح اللي الأكل بقاله من 4 لـ 5 أيام عليه، كل واحدة تعدي تأكل وتمشي وفيه اللي بطنها بتوجعها فمش بتكرر الأكل منه مرة تانية، وفيه اللي متعودة على الأكل الحمضان ده.
وتابعت رضوى الشربيني: لو الضغوط دي لأن أنت زي الطفل مع الستات اللي بيمارسوها عليك، فأشمعنا بتتحول لراجل على مراتك وتفضل تشخط وتزعق وتجعر والجيران يفضلوا يسمعوك، واللا ماما طلعتلك أن ألف مين يتمناك، كده روح اتعالج عشان تكون راجل مش متاح أو محترم احتمال برضه.
وأردفت رضوى الشربيني: على فكرة أنا مش بهاجم الرجالة الخاينة، عشان مش هيستحملوا مني دقيقتين اتكلم عليهم، أنا بس بيتطلب مني أعلق على حاجة من حد أو حد بيأخد رأيي مش أكتر.
