جوري بكر بعد زواجها: هودع الجمهور بمسلسل جعفر العمدة.. وهركز في حياتي الشخصية | خاص
كشفت الفنانة والإعلامية جوري بكر عن تفاصيل تعاونها مع محمد رمضان في مسلسل جعفر العمدة، والمقرر عرضه في الموسم الرمضاني 2023.
وقالت جوري بكر لـ القاهرة 24: جعفر العمدة ثاني تعاون بيني وبين محمد رمضان، ولكن بعده هبتعد عن كل شيء وأركز في حياتي الشخصية وهاخد إجازة محارب، وأتمنى المسلسل ينجح ويكون مشرف، وأكيد هرجع تاني للجمهور ومعرفش ربنا شايل لي إيه.
وواصلت جوري بكر: زوجي بيدعمني في التمثيل وباخد رأيه في كل شيء لأنه يهمني وأنا بقبل الأدوار اللي أشوفها كويسة بالنسبة لي والفترة الجاية هركز في الإعلام أكتر.
جوري بكر: عقد قراني كان مفاجأة
كما سبق وكشفت جوري بكر سبب إخفائها موعد زفافها، وقالت في نصريح سابق لـ القاهرة 24: زواجي كان مفاجأة لأن كان المفروض نكتب الكتاب بعد رمضان بس قولنا نكتب الكتاب قبل رمضان ومش هعمل فرح تاني لأني اكتفيت بـ كتب الكتاب وأقتصر على الأصدقاء المقربين.
وواصلت جوري بكر: أنا حياتي الخاصة ملكي أنا ومش بحب أنشر تفاصيل حياتي ولا أقول أنا روحت فين وجيت منين، ومش معنى إني مشهورة أن حياتي ملك الناس، وحذفت صوري مع خطيبي قبل الزواج من على انستجرام تجنبًا للتعليقات السخيفة ولكن دي ضريبة الشهرة في النهاية.
وأضافت جوري بكر: محبتش أنشر تفاصيل زواجي لأني بخاف من الحسد خصوصًا إني حساسة جدًا له وبتأثر به وكمان أنا براعي ظروف الناس لأن في الزمن دا منعرفش مين بيحبنا بجد.
