امشي اطلعي برا.. تعرض فتاة للاعتداء اللفظي والطرد من مطعم شهير بعد الاختلاف على رقم الترابيزة
تعرضت فتاة للاعتداء اللفظي والإهانة والطرد، من قبل إدارة أحد المطاعم، بعد أن تم الاختلاف مع المسؤولين عن حجز الترابيزات في المطعم.
بداية الواقعة بقصر عابدين
وروت هايدي مجدي القصة في تصريحات خاصة لـ القاهرة 24 قائلة: للأسف أسوأ تجربة ممكن الواحد يعدي بيها، قررت السنة دي أنا و4 صحابي نروح مكان اسمه مولاي في قصر عابدين، يوم الخميس 14 أبريل، وحجزنا ودفعنا 9500 جنيه، علمًا بأن سعر التذكرة 2500، وطبعًا قصر عابدين السنه دي اللي مأجر الجزء المقام فيه الإفطار والسحور واحدة اسمها دينا الصبان واللي دمرت لنا اليوم.
وأضافت هايدي: اليوم اتدمر بعد ما كنت رايحة فرحانة وبتصور في المكان مع صحابي، وانبهاري بالقصر مش بـ مولاي، لإن هي ببساطة مأجرة جزء من القصر والترابيزات والكراسي بتاعته، وحتى الأكل من برا، وكنت جاية مشوار لتجربة الإفطار هناك ومكنتش عارفة إن اليوم هينتهي بيا بانهيار عصبي وتعب من الصدمة وقلة الأدب والعنف اللي شوفته.
اختلاف على الترابيزات انتهى بالطرد
واستكملت: بعد ما تصورنا وطلعنا فوق في القصر ودخلنا زي باقي الناس اللي حاجزة، اتفاجئت من البنت اللي شغالة في المكان إنها عايزة تقعدنا في مكان مختلف عن الترابيزة اللي أنا حجزتها وتنقلنا من قاعة 2 لـ قاعة 3 واترمينا في بلكونة متقفلة، لا تمتّ بصلة لشياكة صالة 2 اللي كنت حجزاها، ودا مكنش طلب دا حقي.
وواصلت هايدي مجدي حديثها قائلة: الهانم قررت بما إنه آخر يوم في الصر تعزم أصحابها وقرايبها وترمي اللي حاجز في آخر قاعة، اتكلمت معاها بالحسنى وبهدوء وإن دا مش مكاني وأنا عايزة قعد مكاني، لكنها صممت وغيرت أرقام الترابيزات، وقالتلي بكل قلة ذوق دا اللي عندنا لو مش عاجبك امشي، وكلنا جالنا صدمة.
وأردفت: فجأة تحولت من واحدة بتمثل اشياكة لواحدة بتردح، رديت عليها بقولها ازاي تتكلمي معايا بالاسلوب دا، ترد تقولي انتي أكيد مدخلتيش أماكن شيك قبل كدا.. محدثة نعمة، متعرفش إن باللي عملته دا لا يتم للشياكة والإحترام.
واختتمت، اتفاجأت انها طلبت البودي جارد بتاعها وتشتكم فيا وفي صحابي، وتقول "يالا طلعوا الزبالة دول برا"، ووقتها جالي انهيار عصبي، إنها إزاي تطردني بقلة أدب كدا ومتحترمش ضيوفها، أنا كنت بخرج من المكان ونفسي بيروح مني وقصدت أسمع الجميع إنها شتمتني بدون وجه حق، وصحبتي سندتني لاني مريضة سكر وجالي هبوط شديد وسكري وطي، وكانت بتقولي يارب تموتي ولا تروحي في داهية، ونزلت وأنا حرفيًا منهارة وقعدت تحت في غرفة مدير الأمن لتهدئتي اللي بمنتهى الذوق بيعتذرلي ومكنش عارف يقول ايه لانه ملوش سلطة والأذان أذن وقعدت ساعتين أعيط من وجعي وإهانتي، مع العلم عملتلي بلوك على انستجرام وقالت لي ملكيش فلوس عندي.
