أبرز تصريحات مروة عبد المنعم مع القاهرة 24.. الفن قائم على الشللية وبفكر أطلب من المنتجين يشغلوني
تحدثت الفنانة مروة عبد المنعم عن عدة موضوعات تخص حياتها الفنية والشخصية، خلال حوارها مع القاهرة 24، كما أكدت أنها ستحاول في الفترة المقبلة، أن تطلب من المنتجين أن يبحثوا لها عن دور بأعمالهم، لأن التمثيل هو مهنتها الوحيدة.
نستعرض لكم في هذا التقرير أبرز تصريحات مروة عبد المنعم مع القاهرة 24
-أنا مش في قاموسي خالص إني أتقبل الخيانة لا من زوج ولا من صديق.
-ممكن أتقبل الكدب وأوجدله مبررات وبرضه على حسب الكدبة كبيرة ولا صغيرة.
-أنا اتجهت للإعلام من زمان وبحبه ومدام مفيش حاجة في التمثيل تقعدني من الإعلام يبقى أكمل عادي.
-بتضايق إني مش واخدة حقي كممثلة خصوصا إنه مصدر رزقي وإن الفن زي الإدمان لو ممارستهوش بتعب نفسيا.
-بفكر الفترة الجاية أكلم منتجين أطلب منهم شغل بس بصراحة بحسها مهينة شوية.
-الفن فعلا قائم على فكرة الشللية وده طبيعي لأن أنا عن نفسي لو هرشح حد لدور أكيد هرشح صحابي.
-أنا معرفش أشتغل غير التمثيل برغم إنها مهنة مش مضمونة.
-عمري ما روحت لدكتور نفسي عشان يساعدني أتقمص شخصية لأ أنا بذاكرها لوحدي.
-جالي تعليقات كتير ناس بتقولي ما تبيعي الفيلا اللي انتي ساكنة فيها وهما ميعرفوش إن البيت ده هو اللي جايبلي الكافية.
-أنا مش محجبة بس بصلي وبصوم والدين عندي حاجة مهمة جدا ومبفكرش في الحجاب خالص.
-بخاف من الموت جدا ومش بتقبله من ساعة ما بابا اتوفى وبقيت متعقدة إن أي حد من أهلي يموت.
-بخاف من الفراق في الموت لكن مش بخاف من الموت نفسه ووقفت على غسل ناس كتير عادي.
-إحنا شعب بيرمي كل حاجة للعين ولكن السبب في حريق أوضة بنتي هو الإهمال ونزلت البوست ده عشان أغزي العين.
مروة عبد المنعم وقضية الخادمة
على جانب آخر، سبق وعلقت مروة عبد المنعم خلال حوارها مع القاهرة 24، عن ظلم الكثير من الأشخاص لها وقت قضية الخادمة، التي توفيت في منزلها، وأكدت مروة أن الإعلامي الراحل وائل الإبراشي ظلمها، قائلة: وائل الإبراشي ظلمني، جاب أسرة الخادمة وعمل مزيكا حزينة وطلعهم هما اللي مظلومين، وقال إني قاتلة وشوهت الجثة رغم أن مفيش كل دا، ومش مسامحاه وربنا يتولاه برحمته، هو عند ربنا وهو أولى بيه.
