جار المتهم قاتل 7 من أسرته: كنت بلاقي بواقي خمرة دايما بتترمي من شقته
كشفت التحقيقات في واقعة اتهام شخص بقتل 7 من أسرته في الإسكندرية، عن أن المتهم أنهى حياة زوجته وأطفاله ووالد زوجته وشقيقها لرفضهم ذهاب زوجته إلى منزله بعد غضبها.
وأوضحت التحقيقات، أنه تم اكتشاف الواقعة من قبل شقيقة الزوجة عند ذهابها لمنزل والدتها إثر اتصال الطفل الوحيد الناجي بها، وعندما فتحت باب الشقة فوجئت ببركة من الدماء، وكل أفراد الأسرة جثث هامدة، إلا نجل شقيقتها الأكبر والذي نقل إلى المستشفى بإصابات بالغة.
وقال أحد جيران المتهم، إنه يسكن بذات الشارع المتفرع من شارع خليل السويس في البيطاش، مردفا: أنا ساكن في نفس العمارة اللي كان مأجر فيها ياسر، هو ساكن في الدور السادس، وأنا ساكن في الدور الرابع، وأنا ساكن في العمارة من حوالي 8 سنوات أنا ومراتي وعيالي، وياسر جه أجر في العمارة من حوالي 10 شهور، بس أنا مكانش ليا علاقة بيه لحد 3 شهور لما لاحظت ناس كتير رجالة وستات بتيجي تطلع الشقة عنده لما هو مبيكنش موجود في البيت، وبدأت ألاحظ زبالة بتنزل من عندهم فيها خمور فأنا بدأت أشك في الموضوع.
كما أضاف جار المتهم، أنه منذ حوالي 3 أشهر بدأت علاقته بالمتهم ياسر بعدما أخبره أنه رأى سيدة تلقي القمامة أمام شقته، قائلا: قولتله أنا مرضتش أتكلم معاها وقلت أبلغك أنت، وثاني يوم قابلني ورضاني، وبعد كده الناس في المنطقة بدأت تلاحظ إن في ناس غريبة بتطلع العمارة عندي فأنا كلمته وقلت له خلي بالك في رجالة وستات بتطلع عندك العمارة، وهو قالي أنت كده بتتكلم في أعراض بيتي، وهددني بأنه ممكن يحبسني وأنا قلت له أنا هثبتلك، ومن حوالي شهر كنت أنا إجازة من الشغل وكان فيه رجالة كتير.
وجاءت أقوال جار المتهم بقتل 7 من أسرته في الإسكندرية كالآتي:
س: من كان يقيم بصفة دائمة داخل الوحدة السكنية محل سكن المتهم ياسر علي حسن؟
ج: مراته بس أنا معرفش اسمها وعيال وواحدة ست معاها طفلين، وست تالتة بتيجي لما ياسر بيقي موجود.
س: وما هي الأسماء الثلاثية لسالفي الذكر؟
ج: معرفش.
س: وما تعليلك لوجود 3 سيدات رفقة المتهم ياسر علي حسن بذات المسكن؟
ج: أنا معرفش وهو موضوع غريب، بس فيه واحدة منهم مراته أم عياله، والاتنين التانيين متجوزهم عرفي.
س: وكيف علمت بواقعة زواجه من السيدتين سالفتي الذكر بعقد زواج عرفي؟
ج: مروان اللي مأجر له الشقة قالي إنه متجوزهم عرفي.
س: ما الذي لاحظته خلال فترة إقامة المتهم ياسر بالعقار محل سكنك؟
ج: أنا بدأت ألاحظ فيه رجالة وستات كتير بتطلع في الوقت اللي هو مبيكنش موجود فيه في البيت وفيه بواقي خمرة بتترمي من الشقة عنده.
س: ما هو سبب وجود عدد من الرجال والسيدات داخل الوحدة السكنية؟
ج: معرفش بس هو موضوع غریب ومش مظبوط.
س: وما الذي بدر منك عقب ذلك؟
ج: أنا كلمت صاحب الشقة كذا مرة حوالي مرتين أو 3 بس، وكان بيقولي إنه كلم أبوه وهو أبوه هيمشيه من الشقة ومكنتش بشوف أي جديد لحد ما قابلت ياسر بالصدفة مرة، وقلت له خلي بالك في رجالة وستات بتطلع عندك الشقة، وهو زعقلي واتخانق معايا، وقالي أنت كده بتكلم في أعراض بيتي وهددني بأنه ممكن يحبسي فأنا قلت له هثبتلك.
س: ما هو رد فعل المتهم ياسر حين أبلغته بوجود أفراد داخل الوحدة السكنية محل سكنه خلال ذهابه إلى عمله؟
ج: رد فعله كان غريب وزعقلي وقالي بتتكلم في أعراض بيتي وهددني بأنه ممكن يحبسي، بس أنا حسيته إنه عارف، وأنا قلت له هثبتلك.
س: وما الذي دعاك إلى الشعور بوجود عدد من الرجال والسيدات داخل الوحدة السكنية محل سكنه خلال وجوده بعمله؟
ج: بالرغم من أنه كان بيزعق، بس أنا حسيت إنه كان بيمثل لأنه كان بارد جدا في زعيقه.
