تامر فرج عن مسرحية طيب وأمير: هدفنا كان وطني.. ورجعنا روح المسرح الكوميدي
تحدث الفنان تامر فرج، عن تحضيرات مسرحية طيب وأمير التي تُعرض على مسرح ميامي، بجانب الحديث عن المقارنة بينه وبين الفنان فؤاد المهندس والزعيم عادل إمام.
وقال تامر فرج في لقائه مع القاهرة 24، عن مسرحية طيب وأمير: هي حدث إعلامي وثقافي مهم جدًا لأن مسرح الدولة بيقدم هذه المسرحية بهذه الجودة، ويمكن أحب أبدأ القول في التحضيرات إن الهدف بتاعنا كلنا كان هدف وطني أكتر من إنه هدف فني، كنا عايزين نُعيد الروح في المسرح الكوميدي ومسرح الدولة، ومينفعش نترك المسرح الكوميدي كده يُسدل عليه الستار.
وتابع: إحنا عايزين نخلي مسرح الدولة يعود لمكانه الطبيعي وميتسحبش السجاد من تحت رجلين مصر في الثقافة على وجه الخصوص، ودي كانت فكرة عظيمة من مدير المسرح ومخرج المسرحية، والمسرحية مزيج من سلامة في خير وصاحب الجلالة، والكاتب أحمد الملاواني قدر إنه يصيغ ده.
أما عن المقارنة بين مسرحية طيب وأمير بالأعمال المسرحية الأخرى خاصة أنها مأخوذة من التراث، فعلق تامر فرج قائلًا: إحنا عندنا 48 تيمة في العالم كله اللي ماشي عليها الفنون، وفي نفس الوقت العمل الأدبي أو الروائي أو الفني بيتعمل علشان يتقدم أكتر من مرة، وهنلاقي كل المسرحيات مأخوذة من تراث عالمي أو قومي أو روايات عالمية.
وأضاف تامر فرح متحدثًا عن فكرة مقارنته بالفنان فؤاد المهندس والزعيم عادل إمام: إن إحنا نُعيد إحياء عمل مش مشكلة في حد ذاته، ولكن المشكلة في مقارنة مع الفنانين اللي عملوا المسرحيات، يعني أنا كان فيه خوف في المقارنة بيني وبين الفنان فؤاد المهندس في صاحب الجلالة، وأستاذ عادل إمام في مسرحية الزعيم، واتقارنت بفنانيين عظماء أنا مينفعش أتقارن بيهم، ولكن الحمد لله قدرت أحطت بصمتي الخاصة والشخصية يبقى ليها طعم لوحدها.
