إوعي تزعليه ولا مننا تحرميه| أخت عريس توصي العروس في حفل الزفاف.. ومتابعون: تمثيل مبالغ فيه
أثار مقطع فيديو لأخت عريس أثناء حفل زفاف شقيقها، وهي توصي العروس ببعض الوصايا أمام المعازيم، سخرية مستخدمي مواقع التواصل الاجتماعي، خلال الساعات القليلة الماضية.
وتصدر مقطع فيديو أخت العريس، الذي نشره الفوتوجرافر ميدو عيسى، تريند فيسبوك، حيث ظهرت فيه فتاة من محافظة كفر الشيخ، وهي تنصح وتوصي عروس أخيها أثناء حفل الزفاف.
تفاعل السوشيال ميديا مع الفيديو
وعلق خالد عبد الكريم، على الفيديو: كويس إنها ما قالتش إنه أعظم انتصاراتها كانت هتبقى كارثة، فيما كتب آخر: تمثيل مبالغ فيه، الأفراح بقت ساحة الاتنشن، كل الأفراح بتتلم بحتتين جاتوه ورقصة تنورة معرفش حوارات الأفراح كترت ليه.
فيما كتبت مريم محمد، في منشور لها تعليقًا على الفيديو المتداول: في ناس كتير بتتريق علي البنت دي على أنها عملت مصيبة علشان بتقول لـ مرات أخوها أنها تحافظ عليه وشايفينها حية وسودة مع إنها عشمانة فيها وإن أخوها ده سندها وضهرها، إحنا وصلنا لمرحلة غبية أوي بجد بنتريق علي حاجات مفيش داعي إننا نتريق اصلا.. البنت مقالتش حاجة غلط دي مقالتش العيبة حتى ربنا يهدي الناس المريضة بجد.
وصايا شقيقة العريس للعروس يوم الزفاف
وقالت شقيقة العريس، خلال الفيديو، لـ زوجة أخيها: عايزاكي تحافظي عليه وإوعي في يوم تزعليه وأوعدك إن هو في يوم ما هيجي عليكي.. فوق دماغنا هنشيلك وفي عنينا هنحطك.. وفي قلبنا إنتي موجودة، مش عايزاكي في يوم تزعليه ولا مننا تحرميه، وهو عمره في يوم ما هيجي عليكي، ولو جه عليكي إحنا معاكي في ظهرك.. إحنا سندك.. عمر ما حد فينا هيجي عليكي في يوم من الأيام.
وتابعت شقيقة العريس: عشان خاطري.. وصية أوصيها ليكي يا ندى، في عمرك ما تخليه يجي علينا أبدًا، ولا في عمرك تاخديه مننا أبدًا.. مليش غيره طلعت بالدنيا به، هو سندي وضهري.. إبني وحبيبي وعمري كله، وأنا أوعدك إنه في عينه هيشيلك وعمره ما هيزعلك ولا يجي عليكي.
وأضافت: إنتي عارفة إنك على دماغنا من فوق وهنحافظ عليكي وفي عنينا، وعايزة من كل الحضور يدعو لهم إن ربنا يرزقهم بالذرية الصالحة ويصلح لهم حالهم.
