مروة عبد المنعم: طلاقي أصعب من اتهامي بقتل الخادمة.. وطلبت من أشرف زكي المساعدة
كشفت الفنانة مروة عبد المنعم عن رأيها في اعتزال الفنانة ميرهان حسين، مؤكدة أنها تشعر بعدم التقدير ولكنها أضعف من قرار الاعتزال، كما تحدثت عن رفضها دخول ابنتها مجال التمثيل وإمكانية زواجها مرة أخرى.
وقالت مروة عبد المنعم خلال برنامج الستات الذي تقدمه الإعلامية سهير جودة: مريت بتجربة ميرهان حسين وحسيت بكل كلمة بتقولها وإحساسها بعدم التقدير، ولكن أنا أضعف من قرار الاعتزال؛ لأن فيه فرق بين الممثل والمبدع، وفيه ناس بيمثلوا عشان الشهرة والفلوس فقط.
وواصلت مروة عبد المنعم: مفكرتش في الاعتزال لأني بحب الفن جدا وعملت مسرح وعملت محتوى على السوشيال ميديا؛ لأن جوايا حالة إبداع لازم تطلع، وأنا في مرحلة ابتلاء لو استسلمت له هيتغلب عليا وعشان كدا لازم أفضل أسعى.
وأضافت مروة عبد المنعم: مش عارفة سبب قلة أعمالي ولكن الحياة وقفت بعد قضية الخادمة اللي توفيت في بيتي؛ لأن وقتها الإعلام اهتم بالقضية ولما البراءة ظهرت مكنش نفس الاهتمام، وأنا اتظلمت من نظرة الناس ليا من غير ما يفهموا القصة كاملة.
وتطرقت مروة عبد المنعم للحديث عن تعرضها للانتقادات بسبب قضية الخادمة، قائلة: لحد دلوقتي الناس بيشتموني وبيدعوا على بنتي؛ لأنهم ميعرفوش إني بريئة من قتل الخادمة، وبزعل لما حد بيتكلم على ولادي ولكن مع الأسف مش هيتغيروا.
أما عن رفضها دخول ابنتها مجال التمثيل، علقت مروة عبد المنعم، قائلة: مش عايزة بنتي تدخل التمثيل لأنها مهنة متعبة نفسيا وأنا خايفة عليها ولو الواحد مكنش قريب من ربنا هيتعب وهيتغر بسبب الكلام الحلو والشهرة ولازم نفهم إن الدنيا متقلبة واللي بيصدق الشهرة وكلام الناس ممكن فجأة شخص تاني ياخد مكانه ويجيله صدمة.
وأشارت مروة عبد المنعم إلى أنها مرت بأزمة مادية واضطرت لعرض منزلها للإيجار، قائلة: طلاقي أصعب من اتهامي في قضية قتل الخادمة ومريت بأزمات وأجرت شقتي التمليك وعشت أنا في شقة إيجار عشان أقدر أصرف على ولادي وأنا ممكن أعيش بـ 200 جنيه أو 1000 جنيه ولكن بشيل جزء من الفلوس للمستقبل لأن لو مش معايا فلوس مش عارفة هروح فين، والمشكلة أن الجمهور دايما شايف الفنان عنده بنك ولكن دا غير حقيقي.
كما كشفت مروة عبد المنعم سر اتجاهها صناعة المحتوى على السوشيال ميديا، قائلة: أنا لجأت قبل كدا لـ أشرف زكي عشان اشتغل وكلمته مرتين وطلبت منه يساعدني، وتفاعلي المستمر على السوشيال ميديا كان هدفي منه أن الناس تفتكرني لأني بعدت فترة كبيرة عن الوسط الفني وحسيت بنتي متعرفنيش وقررت إني لازم أعرف الجيل الجديد بيا ودخلت عالم التيك توك وكان عندي محتوى مهم ولكنه ليس بديلًا عن الفن.
مروة عبد المنعم تكشف سر شائعة زواجها من أحمد عزمي
واستكملت مروة عبد المنعم، حديثها، قائلة: أنا طول عمري مش اجتماعية ولما دخلت الوسط الفني كنت بشتغل من غير علاقات، وكنت بشتغل كويس جدا لأن ربنا اللي بيشغلني ولكن اكتشتفت أن في الوسط الفني لازم يكون فيه علاقات.
أما عن إمكانية زواجها مرة أخرى، علقت مروة عبد المنعم قائلة: أنا اتعقدت من الزواج وباب الزواج مقفول في حياتي وأكيد دا ظلم ليا لأني ست عادية، وعمري ما هقبل أسيب شغلي عشان أي شخص لأني مش بشتغل عشان الفلوس ولو كنت بعمل دا كنت هبقى في حتة تانية، وولادي مش معترضين على فكرة زواجي مرة أخرى.
كما علقت مروة عبد المنعم على شائعات زواجها المتكررة، قائلة: انتشرت شائعات عن زواجي بـ مصطفى قمر لمجرد أننا اتصورنا سوا، وكمان شائعة زواجي من أحمد عزمي وساعتها كنت متزوجة من شهرين وهو كان خاطب ومع ذلك انتشرت الشائعة.
