نيللي كريم: الست هي راجل البيت دلوقتي.. وهذه تفاصيل شخصيتي في مسلسل ليه لأ 3
كشفت الفنانة نيللي كريم تفاصيل شخصيتها في مسلسل ليه لأ 3، والذي من المقرر عرضه بداية من يوم 22 يونيو الجاري عبر منصة شاهد الإلكترونية.
وقالت نيللي كريم في مقابلتها مع منصة شاهد: أنا بقدم دور شيري هي أم لطفلين، وبتشوف إيه اللي بيحصل من مشاكل في العيلة دي في فترة زمنية معينة، وهي شخصية حقيقية موجودة معانا ووسط أصحابي وبنشوفها كتير.
وعن وجه التشابه بين شخصيتها في مسلسل ليه لأ 3، وشخصيتها الحقيقية، فعلقت نيللي كريم قائلة: الحاجات المشتركة بما إني عندي أولاد وفي المسلسل كمان عندي أولاد فبسأل كتير عاملين إيه وبتعملوا إيه في الحياة؟ وبديهم نصائح كتير.
وأضافت نيللي كريم: أزمة المسلسل أن الأم بتضحي بحاجات كتير جدًا علشان سعادة أولادها، وابنها بالتحديد لأن هنشوف تعامل الولد في الظروف اللي زي دي، خاصة أنه فاكر نفسه راجل البيت لأنه الولد، والأم بتحاول ترضيه بكل الأشكال ولكن هتيجي في نقطة بتقف وقفة مش عايزة حد ييجي عليها ولا هي تيجي على أولادها، وهنا نقطة التحول بتاعة المسلسل.
نيللي كريم: الست هي راجل البيت دلوقتي
كما تطرقت نيللي كريم في حديثها، إلى دور المرأة في الأسرة بعد الانفصال، قائلة: راجل البيت دي كلمة كبيرة أوي وأحيانًا الناس بتستخدمها من غير ما تفكر، ودلوقتي في الزمن اللي إحنا فيه أو على الأقل العائلات اللي بشوفها حواليا الستات هي اللي بتبقى راجل البيت، الستات دلوقتي هي اللي بتشيل البيت والأولاد خاصة لما بيحصل حالة طلاق 99% من الأبهات مبيدفعوش الفلوس اللي عليهم وبيكونوا شايلين إيديهم حتى لو بيدفعوا بيدفعوا رقم ضئيل، فالست هي راجل البيت حاليًا.
واختتمت نيللي كريم حديثها: مش حاسة أن حد لازم يضحي علشان حد، لو الأم بتقول أنا ضحيت بشغلي ومستقبلي علشان أربي ولادي طب ما الولاد بيكبروا وبيتجوزوا وبيروحوا، هيقولوا محدش قالك تضحي، فيه فرضيات في التربية الشرقية ميتبنيش عليها عائلة سليمة ولا أفكار ولا حياة سليمة.
