تامر عاشور: عمرو مصطفى عمود من أعمدة الموسيقى ولكن تجربته بالذكاء الاصطناعي مش هتشوف النور
علق الفنان تامر عاشور، على تصريحات الفنان والملحن عمرو مصطفى، بشأن انهيار صناعة الموسيقى في مصر، كما تحدث عن تجربة عمرو مصطفى في إعادة إحياء صوت أم كلثوم بالذكاء الاصطناعي.
وقال تامر عاشور في تصريحات تلفزيونية: أنا مش مع أي شخص يطلع يقرر إن الموسيقى انهارت، وأنا بقول إن مفيش شخص يشوف ده، صناعة الموسيقى زي الفل واحنا طول عمرنا عندنا فنانيين كتير جدًا.
وأضاف تامر عاشور، أن الفنان عمرو مصطفى عمود من أعمدة صناعة الموسيقى، قائلًا: بيصعب عليا يطلع حد مصري يتكلم ويقول الصناعة انهارت طب ما انت في الصناعة، انهارت ازاي وانت موجود؟ ما انت عمود من أعمدة صناعة الموسيقى.
وأوضح تامر عاشور: عمرو مصطفى شخص متجدد والموسيقى بتاعته ناجحة على مر التاريخ مع فنانين كبار ولكن ده لا يُعطي الحق لأي حد أنه يقيم الوسط الفني عمومًا.
تامر عاشور: تجربة الذكاء الاصطناعي مش هتنجح ولا هتشوف النور
وأكد الفنان تامر عاشور، أن تجربة الفنان عمرو مصطفى في إعادة إحياء صوت أم كلثوم بالذكاء الاصطناعي لن تنجح، قائلًا: مشوفتش تجربة عمرو مصطفى مع مي فاروق، ومي فاروق أصلًا صوتها لوحده حكاية ومش محتاجة أي ذكاء اصطناعي، وأم كلثوم كانت موجودة وربنا افتكرها ومن وجهة نظري الغناء بالذكاء الاصطناعي مش هينجح ولا هيشوف النور، لأن أنا عارف أن مش أم كلثوم اللي بتغني والجمهور مش حد عابر.
واختتم تامر عاشور حديثه قائلًا: لكن أغنية أفتكرلك إيه بصوت مي فاروق، مي فاروق تنجح أي حاجة، ولا شك أن عمرو مصطفى ومي فاروق هيكسروا الدنيا.
