مفيش منتج هيجامل أبويا.. رد حاسم من تيام مصطفى قمر على اتهامات دخوله التمثيل بالواسطة
تحدث الفنان تيام مصطفى قمر، عن تعاونه مع والده في فيلم أولاد حريم كريم، وهو الجزء الثاني من فيلم حريم كريم، مشيرًا إلى أن العمل سيكون نقطة مهمة في مسيرته الفنية.
وقال تيام مصطفى قمر: الجزء الأول من الفيلم بيلخص طفولتي واتربيت عليه وحافظه من أوله لآخره وكل حد في جيلي بيحب الفيلم وشافه، ولم أتخيل إن هيكون في جزء تاني ولما عرفت تحمست ولم أتردد لحظة.
تيام مصطفى قمر يتحدث عن كواليس التعاون مع والده
وأضاف تيام مصطفى قمر: أنا ووالدي كان نفسنا نشتغل مع بعض وكنا مستنيين الفرصة الصح وفخور إني معاه ومبسوط وحاسس إنها نقطة مهمة في مسيرتي
وعن الوقوف أمام والده: أكتر بني آدم الناس بترتاح وهي بتشتغل معاه ولما بروح اللوكيشن بلاقي الناس فاكة ومرتاحة وفيه بهجة، ولما اشتغلت معاه في نفس اللوكيشن كنت حاسس براحة كبيرة، ومفيش قلق وضغط، وكنت مبسوط وعاوز أطلع أحسن ما عندي ووالدي اللي كان ناقلي الطاقة دي، وهي من أكتر المرات اللي اتبسطت وأنا بشتغل فيها.
وعن كواليس التصوير قال: الكواليس لذيذة ودمها خفيف وكلنا حابين بعض والشغل، وهدفنا أن الفيلم يطلع حلو، والمخرج علي إدريس بذل مجهود كبير في الفيلم، وبنشوف رأي علي إدريس لأننا ماشيين بوجهة نظر المخرج.
ورد تيام مصطفى قمر على اتهامات دخوله التمثيل بالواسطة قائلًا: الناس هتفضل تتكلم مهما قولنا لكن أنا دارس مسرح في الـ AUC، وباخد ورش وبشتغل على نفسي ولما بدأت اشتغلت بره بابا، والحاجات اللي الناس عارفاني منها بره بابا، وأنا مش بآمن بالتمثيل بالواسطة لأن المخرج والمنتج مش هيفكروا ياخدوني مجاملة لوالدي ويفشلوا هما.
