عالم أزهري: كل يوم ممكن تحصل على تأشيرة حج وعمرة لو فعلت هذا الأمر
قال الدكتور أسامة قابيل، من علماء الأزهر الشريف، إن هذه الأيام المباركة يجب أن نتقرب فيها إلى الله سبحانه وتعالى، لافتا إلى أن افضل الأعمال الآن التكبير والتهليل والتحميد إلى الله سبحانه وتعالى.
عالم أزهري: كل يوم ممكن تحصل على تأشيرة حج وعمرة لو فعلت هذا الأمر
وتابع العالم الأزهري، في تصريحات تلفزيونية، اليوم الاثنين: فالتلبية للحجاج والتكبير لغير الحجاج، ذبح الهدى للحجاج، والأضحية لغير الحجاج.
واستكمل العالم الأزهري: الأيام دي يعني بتخلي الإنسان يعيش في جو جميل إن ربنا سبحانه وتعالى بيحبنا، والحب ده لازم نبادله بحب، عشان ربنا سبحانه وتعالى بيحبنا فاحنا لازم نتقرب إلى الله تبارك وتعالى، ونحاول كل واحد في أول يوم كده من الأيام الجميلة دي يجهز الخطة للعمل الصالح، فإن الذين لم يحجون سيذبحوا الأضحية، شوفوا من رحمة ربنا، وإذا كان الحجاج هيقفوا على عرفات ولم يصوموا فإن الذين لم يحجون، يصوموا يوم عرفة اللي هو إن شاء الله يبقى يوم الثلاثاء المقبل.
وأضاف العالم الأزهري: طيب خلينا ندخل بقى كده على الأيام الجميلة دي، احنا هنعمل ايه في الأيام دي؟، الأيام دي بتعمل لنا كده تذكرة دايما إن ربنا سبحانه وتعالى بيكرمنا وبيسعدنا وبيفرحنا، من شهرين ودعنا شهر رمضان، فربنا بيقول حاجة اسمها التمام وحاجة اسمها حسن الختام، التمام ربنا بيتم علينا النعمة وربنا سبحانه وتعالى بيختم لنا السنة بركن عظيم من أركان الإسلام وهو الحج إلى بيت الله الحرام: ولله على الناس حج البيت من استطاع إليه سبيلا.
وواصل العالم الأزهري: في حد يقول ده أنا قلبي متعلق بالكعبة، حتى لو رحت أو ما رحتش، أنا قلبي متعلق بمقام إبراهيم، أنا قلبي متعلق بالشرب من ماء زمزم، أنا قلبي متعلق بالسعي بين الصفا والمروة، أنا قلبي متعلق بالوقوف على عرفات، قلبي متعلق من نفرة من عرفات إلى مزدلفة، هقول له سيدنا النبي بيحبك، كل يوم الفجر بيدي تأشيرة حج وعمرة لكل واحد نفسه يروح ومش قادر، سيدنا النبي بيقول: من صلى الفجر في جماعة كل يوم صباحا لو صليت الفجر في جماعة، وجلس في مصلاه يعني يصلي الفجر في جماعة سواء في البيت او المسجد، ويقعد في المكان اللي هو صلى فيه على سجادة الصلاة أو في المنطقة اللي هو بيصلي فيها في المسجد يذكر الله او يقرأ القرآن أو يسبح أو يحمد، او يهلل أو قاعد في الجامع حتى في أي شيء في سكون كده وطمأنينة حتى تشرق الشمس لحد ما الشمس تطلع ثم يصلي لله تبارك وتعالى ركعتين شوف بقى الجمال والهدية تأشيرة حج وعمرة كل يوم الصبح، إلا كتب الله له أجر حج وعمرة تامة.
