فتاة جامعية تستغيث من والدها بالإسكندرية: مهدد أمي بالقتل ولو حصلنا حاجة يبقى هو السبب | صور
استغاثت طالبة جامعية تُدعى «مريم.م.ع» من تعرضها للتهديد هي ووالدتها وشقيقتها، من قبل والدها، حيث هدد بقتل والدتها، مطالبة بحمايتهم منه.
طالبة بالإسكندرية تستغيث من والدها
وروت الفتاة ما تتعرض له هي ووالدتها، من خلال منشور استغاثة لها عبر صفحتها على الـ فيسبوم، قائلة: بابايا ومامتي متطلقين من 8 سنين بعد معاناة وعشنا بعدها معاناة معاه عشان يسيب أمي في حالها، أبويا ضرب أمي بالنار في عام 2017، كنت ساعتها طفلة عندي 14 سنة والمسدس ده كان كل خناقة في البيت بيتحط في دماغ أمي قدامي أنا وأخواتي وأحنا أطفال وعشنا أذي نفسي وجسدي من صغرنا.
وأضافت الفتاة: كنا بنسمع أحقر كلام منه وحتي لما ضرب أمي بالنار وجابلها ارتجاج في المخ كان بسبب إنه عايزها ترجعله وهي مش عايزة، وطبعًا محصلوش أي حاجة عشان وسايطه كتير أوي وحق أمي ضاع، وبالعكس ده فضل يعملها في محاضر ويقدم إيصالات أمانة مش حقيقية، الفترة ديه حصلت مشاكل وعشان ميحصلش زعيق وبهدلة مكناش قاعدين في بيتنا وبابا اتبلي على ماما بأقذر الكلام وجاب ناس حسبي الله ونعم الوكيل فيهم قالوا كلام كله غلط.
واستكملت الفتاة استغاثتها: أنا بقالي 3 أيام منمتش وأذية نفسية وجسدية، وبالمناسبة أنا عندي امتحانات ومذاكرة وقبل ما أروح لبابا كان بيسحب الملف بتاعي قبل امتحاني بيومين، والمشكلة كلها أصلًا من الأول للآخر أنا مليش دعوة بيها، أنا مش هسكت على حقي وحقي عند ربنا هيجيلي في الدنيا وفي الآخرة، ومعرفتش أروح باقي امتحاناتي وحتى اللي امتحنتهم أنا مكنتش فايقة أصلًا، وتعليمي اللي فاضله سنة ويخلص مش هكمله بسببه.
واختتمت الفتاة رسالتها قائلة: أنا خصيمتك يوم القيامة وخصيمة أي حد جاب سيرة أمي بنص كلمة، هو دلوقتي مهدد إنه هيقتل أمي وهو يعملها عادي ودافع لناس يشوهوها وناس يعملولها محاضر وأقذر كلام، دلوقتي أنا وأختي ومامتي قاعدين مع بعض وكل الكلام والاتفاق مع الناس علي حاجات كلها ظلم وأذى لأمي، أنا سكت عمري كله
ومش هسكت تاني وحقي هجيبه، ولو حصلي أي حاجة أنا أو مامتي أو أختي يبقى هو السبب.
