مرتضى منصور: باب الزمالك اتقفل أمام سيف جعفر مدى الحياة.. وعاتب على بيراميدز
كشف مرتضى منصور، كواليس تمرد لاعبي الزمالك والامتناع عن حضور مران الفريق أمس الأحد، وتحدث عن توقيع سيف جعفر لفريق بيراميدز.
مرتضى منصور: باب الزمالك اتقفل أمام سيف جعفر مدى الحياة
وقال مرتضى منصور في فيديو عبر يوتيوب: يا كابتن عبد الواحد اللي مش عايزنا مش عايزينه، أما اللي قالوا اللاعيبة اتمردت النهاردة، اتصورت معاهم، لاعيبة محترمة وتتحمل ظروف النادي، واجتمعت باللاعيبة وقلت لهم البطولة العربية أهم حاجة وبعدين بطولة الكأس، لكن لاعيبة رجالة واستحملت.
وعن سيف جعفر قال: ربنا يوفقك في بيراميدز بس رجع العقود، صفحة سيف جعفر اتقفلت، يلا بقى العب في بيراميدز، سيف مش أغلى من طارق حامد ولا أبو جبل ولا أغلى من اللي مشيوا من الزمالك، مرتضى منصور يمشي مفيش مشكلة، لكن الزمالك أهم مننا كلنا.
وأضاف: كنا فاكرينك محترم وابن النادي، كان عندك 8 سنين وكانوا هيودوك لنادي درجة ثانية إعارة وأنا رفضت، لأنك ابن النادي، أنت لسه في أولى حضانة يا سيف وعايز 12 مليون جنيه، أومال أدي زيزو كام أدي فتوح كام أدي شلبي كام.
وتابع مرتضى منصور: شوف يا ابني مصيرك ومستقبلك، وباب الزمالك اتقفل قدامك مدى الحياة، أبوك بس اللي عضو في النادي، وسأتقدم ببلاغ للنائب العام الأول، إحنا مش عايزينك بس عايزين عقودنا.
واستطرد: ما حدث من سيف فاروق جعفر استيلاء على المال العام، سيف قالنا أنا وقعت في بيراميدز من شهرين طب جيت تقعد معانا ليه، وقلت لوكيله لو عايز يروح الأهلي مع السلامة.
وأردف مرتضى منصور: سيف خاف يجي الزمالك، وقال مرتضى هيبجبلي فتوات، رغم إن كان معايا أحمد الأحمر والمستشار أحمد جلال، هجيبلك بلطجية ليه.
وواصل: جماهير الزمالك حبيت أحطكم في الصورة، وهتشوفوا الفيديو لما سيف جعفر وقع على العقود، وخليكم واقفين ورا جماهيركم مش ورا لاعب، ويا جمهور الزمالك أنت جمهور قوي وشجاع واللي باعك وباع ناديك قوله مع السلامة والقلب دعيلك.
واختتم حديثه قائلًا: ليا عتاب على بيراميدز، مفيش غير لاعيبة الزمالك، هو مش المفروض العلاقة بينا محترمة، هو أنا مش لما كنت عايز عبد الله السعيد كلمتكم وقولتولي عبد الله من أصول النادي فسيبته وماجيتش جمبه هي دي الأصول.
