السوبرانو أميرة سليم: زوجي هدية من ربنا.. وأنا مرآة لتاريخ عائلتي
حلت السوبرانو العالمية أميرة سليم، ضيفة في برنامج السفيرة عزيزة، المذاع عبر شاشة قناة dmc، وتحدثت عن علاقتها بـ زوجها ودعمه لها وعن مشاركتها في حفل نقل المومياوات.
وقالت السوبرانو أميرة سليم، إن زوجها أكبر الداعمين لها، موضحة: مقتنعين إننا لازم نكون جنب بعض؛ لأن الدعم مشترك ومتبادل؛ ولأنه فنان ومخرج ومصور، وجوده في حياتي أعتقد إنه هدية من عند ربنا.
وأضافت السوبرانو أميرة سليم: نادر لما نلاقي الرجل يتفهم المشوار الفني للمرأة خاصةً في مجال الفن، ومش بس فخور لا كمان بيدعمني بإصرار وبيشجعني على كل حاجة، وهو ده الرجل الحقيقي لما يكون فخور بزوجته زي ما أنا فخورة بيه وبدعمه بنفس الطريقة ونفس القوة.
كما تحدثت السوبرانو أميرة سليم عن اللقاء الأول بينها وبين زوجها، وأكدت أن أول لقاء بينهما كان عقب انتهاء الثورة، قائلةً: أيام الثورة لما كنا بنضف الشوارع ومكنتش أعرفه قبل كدا، وفكرة تنضيف الشوارع عجبتني وهو كان موجود من ضمن مجموعة شباب، وحصل لقاء بيني وبينه وتكرر اللقاء تاني وفي فترة صغيرة جدا عرفنا إننا هنكمل مع بعض، واللقاء كان في تخاطر والعقلية كانت واحدة ونظرتنا للحياة كانت واحدة وواضحة لينا إحنا الاتنين.
السوبرانو أميرة سليم: والدتي كانت مستغربة وجودي في حفل المومياوات
وأعربت السوبرانو أميرة سليم، عن سعادتها بتقديمها فقرة في حفل نقل المومياوات، وتحدثت عن رد فعل والدتها، مضيفة: كان فيه فرحة في المنزل عندي، ووالدتي كانت مستغربة؛ لأن نوع الحفلة مختلف عن حفلات الأوبرا، فالموضوع كان جديد بالنسبة لها، واستغرقت وقت عشان تستوعب، وكانت بتستوعب معايا ردود الفعل وكانت متحمسة جدا وسعيدة بيا.
قررت أغني في الأوبرا في الـ 15 من عمري
وكشفت السوبرانو أميرة سليم، تفاصيل دخولها عالم الغناء في الأوبرا، مؤكدة أنها اختارت هذا المجال وعمرها 15 عامًا، متابعة: كان عندي 15 سنة تقريبا وقولت لـ مامتي إني قررت وعايزة أبقى مغنية أوبرا وهي اتصدمت، والحقيقة بالنسبالها الغناء تحدي كبير ومش مستوعبينه عندنا، ولكنها كانت متحمسة إن عندي هدف واضح ومقتنعة بالفكرة.
وعن رد فعل والدها بعد نجاحها الكبير خلال السنوات الماضية، قالت: والدي كان فخور بيا جدا لما شافني بغني على المسرح وشوفت دموعه بعيني، وشوفت تشجيعه ليا وزودلي طاقة كبيرة وشايف إني مرآة لكل تاريخ عائلتي الفني.
