رضا البحراوي: أبويا عيط لما الناس شالوني في الفرح.. واشتغلت حاجات كتير ومطلعتش بالساهل
تحدث المطرب الشعبي رضا البحراوي، عن تفاصيل بدايته الفنية، مؤكدًا أنه بدأ الغناء منذ عمر الـ 8 سنوات، كما أعرب عن حبه الشديد لعائلته وبالأخص والدته.
وقال رضا البحراوي، خلال لقائه مع الفنانة إسعاد يونس في برنامجها صاحبة السعادة المذاع عبر شاشة قناة DMC: أنا بدأت أغني وأنا عندي 8 سنين، وغنيت في الشارع ومكنتش حاسس إن صوتي حلو، ومنتج شافني وقالي صوتك حلو، وأول مرة شافني كنت بلعب بلي في الشارع وعدى عليا وغنيت وإداني 10 جنيه، وطبعا الحالة المادية كانت على قدها والحمد لله طارق عبد الستار عملي شريط وقبل ما أعمل الشريط كنت بغني في الحنن والأفراح.
وأردف: كنت بغني لرمضان البرنس وجورج، وكنت بقول نفسي أوصل أبقى زي رمضان البرنس، والشريط نزل ساعة مولد السيد البدوي، وبعد أسبوع جالي حد من إسماعيلية وخبط على الشباك وأمي قالتله أنت عايز رضا ليه؟ وهي متعرفش إني بغني، والراجل سابلها بطاقته وقالها هرجعهولك تاني، وأول أجر أخده كان 300 جنيه.
رضا البحراوي: أعمل أي حاجة في الدنيا علشان أمي
وتحدث رضا البحراوي، عن عائلته معربا عن حبه الشديد لوالدته، قائلًا: أول فرح دخلته في الإسماعيلية الناس شالوني وأبويا عيط، ولما نزلت من الفقرة ربنا كرمني وفتح عليا، أنا اشتغلت حاجات كتير ومطلعتش بالساهل، والدي ووالدتي على قد حالهم، وأي حاجة في الدنيا أعملها عشان أمي.
واستكمل: أنا براعي ربنا في كل حاجة وطالما رضيت أهلي وإخواتي ربنا هيكرمني، يعني أمي وبعدين أبويا وبعدين إخواتي وبعدين مراتي وبعدين عيالي، وكل يوم لازم وأنا رايح الشغل أعدي على أمي تدعيلي، وتزعل لو معدتش عليها وساعات تضحك عليا وتقول أنها تعبانة عشان أروح، هي حياتي كلها.
