أول مرة أتعرض للهجوم.. دانا حمدان بعد اتهامها بتشغيل الشباب دون أجر: هدفي أدعمهم وبدي الناس حقها
تعرضت الفنانة دانا حمدان لانتقادات وهجوم من قبل بعض المتابعين على مواقع التواصل الاجتماعي، بعد إعلانها عن مسابقة لمهندسي ديكور شباب.
وكانت أوضحت أنها ستنتقل إلى شقة جديدة ولديها أفكار كثيرة لديكور المنزل، مشيرة إلى أن لديها فكرة مسابقة لمهندسين من شباب الخريجين بشرط أن يعملوا كمجموعة سويا، فيما اتهمها البعض بأنها تستغل الشباب للعمل لديها دون أجر.
دانا حمدان ترد على الهجوم عليها
وردت دانا حمدان على الانتقادات التي تعرضت لها في تصريحات لـ القاهرة 24: لم أتعرض لهجوم من قبل ولا أعرف من هؤلاء وما الهدف من هجومهم عليّ دون مبرر، كلامي كان واضح جدا ولا يوجد به شيء يستدعي الهجوم.
وأضافت: أنا مغلطتش في حد أو ناقشت موضوع شائك لكن بقترح فكرة ليست من اختراعي ولكنها موجودة في العالم كله واتعملت برامج وكسرت الدنيا عالميا وبدأت أفكر فيها بخطوة ولو الخطوات نجحت أطورها لحلقات برنامج وقلت ده في الفيديو.
ما قلتش هشغل حد ببلاش
وتابعت مستنكرة: ما قلتش هشغل حد ببلاش، ولا قلت هشغلهم مقابل إعلان، وهفترض إني اقترحت إني أشغّلهم مقابل إعلان في الحالة دي هيكونوا هما المستفيدين مش أنا، أنا في بدايتي قدمت 10 أعمال دون مقابل مادي وقالوا لي اشتغلي علشان الناس تعرفك وعلشان الانتشار، والشركات الكبيرة بيجيبوا خريجين الجامعات تدريب مقابل أجور رمزية.
وتابعت: هل لو شاب قدم على برنامج مواهب بيروح يقول لهم هغني مقابل فلوس أكيد لأ، ولكن بيكون مقابل إنهم ينتجوله ألبوم أو إنه يظهر قدام الناس، وياما فنانين بدأوا ببرنامج المواهب وفيه اللي نجح وفيه اللي كمل وفيه لأ، وفكرة إنك تاخدي حاجة مقابل الإعلان والدعاية والمعرفة متعارف عليها عالميا في عالم التسويق وإلا كانت الشركات الكبيرة ما تلجأش للفنان في الإعلانات.
وأكملت: ولو كان اللي اتقال فعلًا في نيتي أو في بالي فين العيب إني أقول تعالوا اعملوا البروجيكت مقابل الناس هتعرف شغلكم، وممكن ده يفتح لهم فرص ويأسسوا شركة ويعملوا حاجة.
وأردفت دانا حمدان: أنا مش بتاعة الكلام ده، ولو في نيتي ببلاش مش هروح على الملأ، هل أنا عبيطة، أنا عندي صحابي بعتوا ليا يعاتبوني وبيقولوا لي عاوزة تجيبي شباب وإحنا موجودين، ولكن أنا بعمل ده كنوع من الدعم للشباب.
عمري ما اتعرضت للهجوم ده
واستكملت: عمري ما اتعرضت للهجوم ده، دي أول مرة لأني أنا اللي متابعني عارف المحتوى بتاعي مفيهوش شيء يستدعي النقد ومش عارفة اللي عمل ده عاوز يطلع بإيه وإيه الاستفادة، وعارفة إن نص الناس اللي علقت ما شافوش الفيديو.
وواصلت: جات لي رسايل كتير من شباب وماسكة الدفتر بكتب نمر وتخصص كل واحد من كتر الناس اللي حبوا الفكرة، وفهموا أنا بتكلم في إيه، لأن في شباب بيتخرج ومش بيجيلهم فرص شغل، وممكن بعد البروجيكت الناس تاخدهم، وهل أنا همسك لهم العصاية هل غصبتهم محدش يقدر يجبر حد على حاجة، لو حد حب الفكرة عشان هو حابب ده مقدرش أجبر حد على حاجة.
واستطردت: الناس بعتت لي ما تزعليش، وأي فكرة جديدة طبيعي دايما مش بتلاقي استحسان يمكن لأن الناس مش فاهمة، فأنتي مبتكونيش شايفة خلفية اللي بينقدك وما تعرفيش هو فاهمك ولا مش فاهمك ويمكن مضايق أو مش سوي ممكن في حاجات كتيرة جدًا.
معنديش مبدأ أشغل حد ببلاش
واختتمت دانا حمدان حديثها قائلة: معنديش مبدأ أشغّل حد ببلاش، بدي الناس حقها قبل ما تخلص شغلها، لأن اللي بيشتغل مقابل بينتج أكتر، وبعيد عن كل الليلة دي ده مبدأي في الحياة ومتأكدة بعد ما نخلص ونشوف فرحة الشباب والنجاح اللي عملوه هيفهموا كنت بتكلم في إيه ومتأكدة إن الموضوع هياخد منحنى آخر.
