محمد رحيم عن استخدام عمرو مصطفى للذكاء الاصطناعي: تجربة سعي للتطوير ومحسن جابر عنده حق
تحدث الملحن محمد رحيم عن تجربة الفنان عمرو مصطفى في الذكاء الاصطناعي ورأيه فيها، وبجانب ذلك حديثه عن محسن جابر وحديثه عن الحقوق الفنية والأدبية للأغاني.
وقال محمد رحيم خلال ندوته بـ القاهرة 24: عمرو مصطفى اتهاجم بسبب حقوق الملكية والحقوق الأدبية والفنية، وعمرو كفنان بيبدع، وتجربته كلها سعي نحو التطوير، والمنتج محسن جابر شايف أن فيها اعتداء على الحقوق الأدبية والفنية وهو معاه حق في ده.
وعن سرقة ألحانه في بعض المهرجانات والأغاني، أضاف محمد رحيم: عندي ألحان اتسرقت في مهرجانات، وناس زمايلي سرقت ألحان، ومحمد رحيم بقى لون مش بس ملحن.. واللي بيسرق بيكون متأثر بالفنان.
واستكمل رحيم حديثه: عصام كاريكا قدم أغنية وهي عاملة أيه دلوقتي وهو متأثر بـ لون أحمد منيب، ولكن مش سرقة.
محمد رحيم: معنديش مانع أقدم أي لون موسيقي.. وبداية الراب كانت مع شيرين
وعن فكرة تقديمه موسيقى للراب، أوضح رحيم: بقدم الأعمال اللي بحبها ومؤمن بيها، ولما بقدم أغنية ببدأ أفكر مين هيغنيها.. ونادرًا لما أعمل أغنية معينة لحد، قدمت أغنية الليالي رجعتني تاني لـ نوال الزغبي وكانت شكل جديد في التقطيع وكان لون لم تقدمه من قبل، وطول عمري معنديش أي مشاكل خالص أقدم أي لون موسيقي وبحب كل أنواع المزيكا.
واختتم رحيم: بداية الراب كانت مع شيرين عبد الوهاب بـ أغنية صبري قليل، ومعنديش مانع أقدم أغاني مع الرابر، ولكن بشرط الكلام بيقول أيه؟
