صبري فواز: أنا غيور على مهنتي وعمرها ما كانت تافهة.. وحقي أقول إني مبحبش محمد صبحي
كشف الفنان صبري فواز حقيقة خلافه مع محمد صبحي، مؤكدًا أنه يحترمه ولا يقلل من شأنه إطلاقا، بجانب الحديث عن الصعوبات التي واجهها في مسيرته الفنية.
وقال صبري فواز خلال لقائه مع الإعلامية سهير جودة في تصريحات تليفزيونية: أنا حقي أقول بحب مين ومبحبش مين، وعادي أقول إني مبحبش محمد صبحي ومع ذلك أنا بحترمه لإن حبي له أو عدمه ميقللش منه وهو على راسي ولكن دا رأيي.
أما عن أنباء خلافه مع مصطفى كامل، نقيب المهن الموسيقية، علق صبري فواز، قائلا: مفيش بيني وبين مصطفى كامل أي مشكلة ولكن المشكلة إننا محتاجين نستوعب أكتر إننا مختلفين واللي بيحبوا المهرجانات بني آدمين زينا زيهم وعايشين واللي بيحبوا الراب والكلاسيك ومي فاروق وبهاء سلطان موجودين.
وأضاف صبري فواز: إحنا كتير وأذواقنا مختلفة ولو أنا بسمع أم كلثوم مش معناه إن اللي بيسمع عمرو دياب غلط وأنا صح، كل الناس حقها يكون لها مساحة ومفيش حاجة اسمها أمنع شخص لإنه مش عاجبني، سيب الناس تغني وهنشوف الحاجة دي هتفضل موجودة ولا لا وساعتها نحكم.
كما رد صبري فواز على منتقدي الفن، قائلا: التمثيل مهنتي درستها وشقيت فيها ومسمحش حد يعتبرها تافهة والعمر راح واحنا بنشقى فيها، وعيب حد من الزملاء الفنانين يقلل من التمثيل واللي بيعمل كدا بقول له عيب تكون بتأكل عيالك وبتاكل من المهنة وتقلل منها، عيب احترم أكل عيشك.
وأضاف صبري فواز: اللي بيهاجم الفن عنده عدم معرفة، وأنا لما بختلف مع كلام شخص لا يعني إني مش بحترمه، وكل الناس على راسي وبقدرهم ولكن طبيعي اختلف مع وجهة نظرهم.
