أبرز تصريحات محمد لطفي في برنامج كلام الناس: بقالي 18 سنة متجوز والحب دايمًا موجود
حل الفنان محمد لطفي ضيفًا على برنامج كلام الناس للإعلامية ياسمين عز، الذي يعرض عبر قناة Mbc masr، ونستعرض لكم أبرز تصريحات الفنان محمد لطفي في برنامج كلام الناس.
وتحدث الفنان محمد لطفي عن علاقته مع زوجته، حيث قال: مفيش أي صوت شتوي في الحر ده، الحياة عادية وبسيطة، أنا راجل بسيط، والزواج حاجة جميلة، بيحتاج صبر ومودة ورحمة، بقالي 18 سنة متجوز، والحب دايمًا موجود جوه الإنسان وطريقة كل شخص في التعامل بتبين هو بيحب ولا لأ، والمعاملة هي اللي بتعبر عن الحب، وأنا كرجل في فترة الخطوبة شرحت شخصيتي لمراتي، قولتلها طريقتي في الحياة وفي الشغل، وممكن المدام تكلمني مردش وأنا مركز في دور أو شخصية، وهي قدرت ده وعرفت بالفترة والوقت، وحياة الفنان بتبقى مختلفة.
وتابع محمد لطفي حديثه عن تحضيراته لشخصية فرعون في فيلم كباريه، قائلًا: بتعايش مع شخصياتي أحيانًا، وفي حالة فصل، ومينفعش أبقى طول الوقت اختار شخصيات صعبة، بحاول أفصل بردو في حياة عادي، وأحيانًا في شخصيات بتأثر عليا شخصيًا، لما يبقى فيها شر جامد، وأنا بتعامل مع كل حاجه ببساطة، وشخصية فرعون في فيلم كباريه أكثر شخصية أرهقتني لإني شرخت صوتي وقتها، وكنت باخد أدوية وعملت تمارين صوت لغاية ما جبت نوتة الصوت ديه، وكان في شخصية حقيقية زي شخصية فرعون، وكان صوتي عريض، ومعنديش صوت صوتي دلوقتي عندي صوت فرعون، وعلشان أوصلها تاني محتاج تمارين.
وأردف الفنان محمد لطفي في حديثه عن طريقة تعامل الزوجة مع زوجها في السابق، قائلًا: دلوقتي في بنات جميلة وكويسة، ما انتي أهو يا ياسمين خيال، أفكارك كويسة، وزمان كان الستات بتقول للرجالة يا سي، ومعناها يا سيد، وهيزهقوا مع بعض، ولو معدي في المطبخ خد يا سي محمد ده كلام، ممكن يضربها بالفازة مثلًا، والحياة مش ثابتة وكل حاجه بتزيد أو بتقل، ولازم الواحد يتحمل الحياة بكل ظروفها.
محمد لطفي: الإحساس بطعم الأكل نعمة
وعن علاقته بالطبخ، قال الفنان محمد لطفي: عندي ياسمين وهنا ياسمين، وأي ست ما تحبش حد يخش مطبخها، علشان إحنا بنطبخ بنهبدل الدنيا، وأحيانًا بدخل المطبخ وأعمل أكل، وبعرف أعمله علشان قعدت فترة لوحدي، وببقى عايز 3 مساعدين، والإحساس بطعم الأكل نعمة.
