قولتله أنا ضابط وحولي 10 آلاف جنيه.. المتهم بخطف سمير ريان يكشف عن حيلة استخدمها في جريمته
فجر المتهم الرئيسي في واقعة خطف رجل الأعمال سمير ريان، ويعمل محاميا حرا، يدعى محمود م م، تفاصيل مثيرة في الواقعة، واعترف بـ حبك حيلة جهنمية للحصول على أموال من رجل الأعمال وذكر في التحقيقات أنها حق له وبقية أتعاب محاماة.
اعترافات المتهم بخطف سمير ريان
وينشر القاهرة 24 نص التحقيقات الكامل في قضية خطف رجل الأعمال، سمير ريان، والتعدي عليه، في القضية التي حملت رقم 5203 لسنة 2023 جنح منشأة ناصر رقم حصر 372 لسنة 2023.
واقعة خطف سمير ريان
واستهل المتهم الرئيسي في الواقعة التحقيقات بتوضيح تفاصيل العلاقة مع رجل الأعمال سمير ريان، حيث أنكر أمام جهات التحقيق محاولة الخطف لكنه روى التفاصيل الكاملة في الواقعة بقوله: فيه محامية كانت شغالة مع الحاج سمير وكانت بتحصل له شيكات قيمتها 350 ألف جنيه وأنا كنت معاها في القضايا دي كلها وكانت عملالي توكيل بس التوكيل ده اتلغى قبل ما تسافر، وأنا معرفتش غير بعد ما سافرت، وفي الأول الحاج سمير اتفق معاها على نسبة أتعاب 80 ألف جنيه ولما هي كلمت الحاج سمير وقالت له هتحصل الشيكات على أجزاء وقالتله هاخد نسبة على كل شيك رد عليها قالها هجمع لك كله مقدم عربية كيا بيكانتو.
التحقيقات في خطف سمير ريان
تابع المتهم بخطف سمير ريان رجل الأعمال: قالت له المحامية أنا محتاجة 20 ألف علشان عندي ظروف لحد ما بقية الشكات تخلص، وبعدين ندى كلمته تاني وقالتله عايزة بقيت الـ 60 ألف فقالها أنا مشغول النهاردة وكلميني بكرة فكلمته تاني يوم مردش عليها ومبقاش يرد على رقم تليفونها وبعدين في حد عنده كلمها وقالها بتتصلي على الحاج ليه قالتله علشان ليا عنده 60 ألف بقية أتعابي وقفلت، فالحاج سمير كلمها وقالها فلوس أيه اللي باقية أنا مش مديلك عشرين ألف جنيه عايزة أيه تاني فقالتله أنا كنت متفقة معاك على 80 ألف وقالها لو رنيتي عليا تاني هشطبك من النقابة.
اعترافات المتهم بخطف سمير ريان
وقال المتهم بخطف سمير ريان: ندى كلمتني قالتلي أنا خدت 20 ألف جنيه وبقيلي 60 ألف جنيه وهو مش راضي يدفعهم قولتلها وانتي شايفة الحل أيه فقالتلي ما بيخافش غير من ضباط المباحث وبعتتلي رقمه فكلمته ألو أيوه يا حج معاك الرائد محمود فراج معاون مباحث، فقالي أزيك يا باشا أخبارك أيه قولتله تمام أنت عامل أيه مش فاكرني؟! فقالي لا إزاي أنت فين دلوقتي قولتله في الدنيا وقولتله أنا محتاج مبلغ 10000 جنيه علشان بنتي محجوزة في مستشفى في المقطم وعايزين 33 ألف جنيه بس الدكتور منزلهم لـ10000 آلاف بس وأنا مش معايا المبلغ ده دلوقتي.
تفاصيل خطف سمير ريان
أكمل المتهم بخطف سمير ريان في التحقيقات: قالي حالا يا باشا 10000 جنيه هخلي حد من المعرض يكلمك دلوقتي ويبعتهملك على المستشفى لو أنت مستعجل عليهم أوي هبعتهملك على فودافون كاش فاديته رقم كشك في التجمع والرقم على موبايلي وبعتلي الفلوس وبقى يكلمني يقولي أيه يا محمود بيه عامل أيه بنتك عاملة أيه وبعدها بكام يوم كلمته على الواتس اب وبعتله فويس وقولتله بنتي ماتت ومحتاج 10000 آلاف جنيه تانية عشان الدفن وكده فقالي تعالى المعرض عندي فقولتله لا أنا في التجمع بس هبعتلك الأمين هاني المعرض ياخدهم منك على أساس إن فيه أمين شرطة شغال معايا اسمه هاني وبعدين قالي ماشي، فتحت أبلیکشن إن درايفر وطلبت سائق، عملت رحلة يعني بس موتوسيكل وحددت اللوكيشن على المعرض بتاع سمير ريان.
اعترافات المتهم بخطف سمير ريان رجل الاعمال
وأقر المتهم بخطف رجل الأعمال سمير ريان: كلمت الكابتن بتاع إن درايفر وقولتله إني محدد اللوكيشن على موقع كذا قبل ما يجي وقالي أنا معايا رحلة هخلصها وأجيلك عند المعرض فقولتله لا أنا في التجمع مش في المعرض هستأذنك بس تروح تعدي على المعرض اللي متحدد عليه اللوكيشن ده هتقابل مدير المعرض هيديلك ظرف وتجيلي التجمع بنفس الرحلة، وأنا هحاسبك لما تيجي فقالي ماشي وراح المعرض وقابل استاذ عبد العال وفعلا دخل ليه المعرض وبعدين قاله مفيش فلوس هنبعتها وكلملي اللي بعتك.
نص تحقيقات سمير ريان
واعترف المتهم بخطف سمير ريان: الدرايفر كلمني وأدى الموبايل لأستاذ عبد العال، فقولتله ياباشا أنا مطلبتش منك حاجة وكلامي مع الحاج وبعديها الحاج سمير لقيته بعتلي كذه فويس على الواتس اب وكلمني على الموبايل ولقيته بيقولي يا محمود بيه إحنا جبنا البيانات بتاعتك وعرفنا إنك محامي حر وقاعد في التجمع ووالدك من الخليفة والموضوع هكبره عليك وانا اسمي الحاج سمير ريان، فرديت عليه كده يا حج دي أتعاب أنت كنت واكلها على زميلتي المحامية اللي حصلتلك الشيكات ومدتش ليها أتعابها كل واحد بيعرف ياخد حقه بطريقته يا حج، وأنا كده بقيت حقي لسه موصليش وبعدها مكلمتوش تاني ولا هو كلمني بعدها ده كل اللي حصل.
القبض على المتهمين بخطف سمير ريان
وتلقى قسم شرطة منشية ناصر بمديرية أمن القاهرة، بلاغا من تاجر سيارات، مقيم بدائرة قسم شرطة التجمع الخامس، بأنه حال سيره بالسيارة "ملكه" في دائرة القسم فوجئ بسيارة "ميكروباص" يستقلها مجهولون، أوقفوه واستقلوا السيارة صحبته والتوجه به إلى طريق الأوتوستراد، ولدى استغاثته بالمارة تركوا السيارة ولاذوا بالفرار.
ونجحت مباحث القاهرة بعد جمع المعلومات ومن خلال التعامل الفني، وتوصلت الجهود إلى تحديد مرتكبي الواقعة، وتبين أنهم 6 أشخاص أحدهم يعمل طرف المجني عليه، ولـ3 منهم معلومات جنائية.
- سمير ريان
- سمير ريان رجل الاعمال
- خطف وسرقة سمير ريان رجل الاعمال
- المتهم بخطف وسرقة سمير ريان
- رجل الأعمال سمير ريان
- خطف سمير ريان حوت السيارات
- سمير ريان حوت السيارات
- اعترافات المتهم بخطف وسرقة سمير ريان
- واقعة خطف سمير ريان
- خطف سمير ريان رجل الاعمال
- نص تحقيقات سمير ريان
- اعترافات المتهم بخطف سمير ريان
- تفاصيل خطف سمير ريان
- تحقيقات سمير ريان
