محمد عطية: كنت بستنى عمرو دياب عند الاستوديو 8 ساعات ومبعرفش أشوفه.. وستار أكاديمي غير حياتي
أكد الفنان محمد عطية، أن مشاركته في برنامج ستار أكاديمي، كانت نقلة في حياته على المستوى الفني والمادي، موضحًا أنه كان يسعى للحصول على فرصة من الفنان عمرو دياب، وتامر حسني.
وقال محمد عطية في تصريحات إذاعية: برنامج ستار أكاديمي زي ما كان نعمة في وقت من الأوقات، كان نقمة في وقت من الأوقات، لأن الناس اتعلقت بالشخصيات مش بالأعمال الفنية، ولما اتخرجت من الأكاديمية الناس مستنية أغاني على الشخصية اللي شافتها، والناس عايزة أغاني على مستوى عمرو دياب، يا جماعة عمرو دياب إحنا مش قده ده قعد 20 سنة خبرة، أنا بدأت اكتسب خبرة مؤخرًا، لأني مريت بنجاحات وفشل وبدأت اختار، أنا روحت ستار أكاديمي شاب من طنطا بسيط جدًا، راجع مصر الناس كلها عارفاني كنت مخضوض.
وتابع: حاولت كتير إني اشتغل، وكنت بستنى عمرو دياب عند الاستوديو بالـ 8 ساعات ومبعرش أشوفه، وتامر حسني كنت بستناه عشان أسمعه أغنية، وأنا محظوظ إني عديت بالمشوار ده وفي نصه جت محطة ستار أكاديمي غيرت حياتي كلها، وبقى تامر حسني يكلمني وعمرو دياب عارف اسمي.
وأضاف: كل مرحلة عدت على الواحد في حياته وبحن ليها أكيد بتوحشني، لكن معنديش حتة إني أعيدها تاني، وستار أكاديمي كانت مرحلة حلوة وغيرت في حياتي، لكن مش هخوض نفس التجربة تاني، الحياة فيها حاجات تانية نجربها.
