فتاة تتهم شركة برفض تعيينها بسبب الحجاب: أُمال لو كنت لابسة عباية مثلًا مش تربون│فيديو
نشرت فتاة تدعى نادين خالد، مقطع فيديو على حسابها الشخصي على تيك توك، ظهرت خلاله في حالة غضب شديد، متهمة إحدى الشركات برفض تعيينها بسبب ارتدائها الحجاب.
رفضوني بسبب الحجاب
وقالت الفتاة خلال الفيديو: بجد فى حاجة مش فهماها، طالما المكان مش عايز يشغل محجبين ليه من الأول مش كاتبين إنكم مش عايزين محجبات، بدل ما يجيبوا الواحد ويجرجروه ويبهدلوه، ويعاملوه بقرف، يقولوا إنهم مش عايزين حد محجب.
وتابعت: مكانوش كاتبين علشان المنظر العام، لكن البنت شافت صورتي على الواتساب وباين إني محجبة، ليه تتفاجئ لما أروح وتقولي: أنتِ محجبة، مكنتش أعرف إنك محجبة.
وأضافت: رديت عليها قلتلها إني محجبة، والصورة مبينة إني محجبة، ودخلتني الانترفيوا مكملتش خمس دقايق، علشان بس الكاميرات تسجل إني دخلت، وأني ياحرام جيت.
وأوضحت: أول مرة حد يعاملني بالطريقة دي، عشان لابسة الطرحة، إزاي في ناس بتعامل حد بسبب إنه لابس طرحة بالطريقة دي، أمال لو كنت لابسة عباية مثلًا مش لابسة تربون، عمر ما حد كلمني وحش علشان بس محجبة، بجد مش مصدقة.
وأشارت إلى أنها، ليست حزينة لرفضها من العمل بسبب الحجاب، موضحة: حتى لو كنت مش محجبة مكنتش هشتغل مع ناس بالعقلية دي، علشان بيعاملوني بطريقة وحشة علشان لابسة حجاب، أنا بس متعصبة من الموقف اللى حصل معايا.
