لو راجل عنفني هعنفه ولو ضربني هضربه.. أبرز تصريحات نسرين أمين التلفزيونية
تحدثت الفنانة نسرين أمين عن العديد من المواقف في حياتها الشخصية ومشوارها الفني، كاشفةً أسرارًا من حياتها الشخصية، وذلك خلال استضافتها في أحد البرامج التلفزيونية.
أبرز تصريحات نسرين أمين التلفزيونية
-أنا فرعونية طباع وشكل ومضمون وبحب أبقى بلدي وشكلي بلدي.
-ممكن أبقى جدعة وساعات قوية وساعات مش قوية.
-ممكن أبقى قوية بس مواقف مواقف وديمًا لما حد بيتحط في موقف مفاجئ بيبقى مضطر يبقى قوي.
-من سنه كنت بعتذر عن شغل كتير ومكنش ليا نفس أشتغل ولكن لما لاقيت نفسي قعدت ومشتغلتش سنة.
-مش بجبر نفسي على شغلي أنا بعمله بحب.
-بحب الأدوار اللي أنا بعملها ابقى مختلفة علشان ده بيخليني مختلفة ومشاعري مختلفة وتكون مختلفة عني وعن بعض.
-بحب الشغل بتاعي جدًا وأنا كنت قبل كده بشتغل جرافيك واشتغلت سنة ولكن كنت حابه التمثيل.
-التمثيل أعطاني شهره ولكن كان هناك ثمن للشهرة إن أي تصرف تحت الأضواء محكومة فيها ومخدتش حرية.
-الفضل لبابا لأنه كان أكتر حد بيختارلي كل حاجة في الجواز والطلاق والجامعة وكل حاجة.
- شخصية شهرزاد كانت نقطة البداية لإنها نقطة مشرفة مع ناس عمالقة في الفن.
-صعب أغير من محمد رمضان ومبغرش من الستات هغير من محمد رمضان!! أنا مبقارنش نفسي بحد ومبسألش نفسي وأنا راضية عن كل مشواري ومش لازم أبص لغيري وبقارن نفسي بس بشخصيتي القديمة.
-فخورة بكوني امرأة لأني حققت حاجات كتيرة ومع إن المرأة لازم تاخد مناصب قيادية لأنها بتهتم بالصحة والتعليم ولازم تاخد حقوقها.
-كل ست ظروفها مختلفة عن الثانية وبتفرق من تربية الأم من الأساس.
-ربيت بنتي على الصراحة إنها تلبس وتاكل اللي هي عاوزاه ولو عندي ولد مكنتش هفضله على البنت.
-أكيد الرسالة مش إن الفنانة تلبس فساتين خليعه على الريد كاربت.
-كل حاجه حصلتلي كان صح وزواجي كان صح وخلفت بنتي بدري ودا شيء سعدني مش بيضايقني.
-مكنتش جاهزه أكون أم بس مامتي وببايا سعدوني جدًا.
-انفصلت بعد سنتين بسبب إن مكنش فيه نفس التفكير وأنا بحب شخصية الراجل الي قدامي واما الشخصية اختلفت مشيت.
-بنتي عمرها ماقالتلي ماما وعمري ماسمعتها منها وهي أعقل مني ونا الي بقولها ماما.
-عمري مافكرت إني أكون زوجة تانيه ولحد الأن معنديش علاقه مع رجل متجوز.
-لو راجل عنفني هعنفه ولو ضربني هضربه.
-لسه منبهرتش بحد لدرجة إني أتجوزه ولازم يكون مقتدر ماديًا
-مش مضطرة أعمل تنازلات في الشغل علشان مرتاحه ماديًا.
-ولازم يكون الرجل في نفس مستوايا الاجتماعي مش شرط يكون وسيم بس لازم يبقى طيب وكريم.
-أنا مشفتش أستاذ تامر مرسي غير مره واحده والفنان شيكو صحبي بس ودي إشاعه ضحكتني.
- شائعة أحمد الفيشاوي إحنا مش مرتبطين ولو عاوزه أرتبط بيه كنت ارتبط بيه من 15 سنة.
-وأحمد عز زميل محترم وبيعجبني كافنان وأنا معجبه بالفنان بوتر.
-بحب الشخصية الناجحة والطيب والكريم.
-بحب عمرو دياب تامر حسني حمادة هلال بهاء سلطان حسن شاكوش ويجز.
-العلاقات بتبقى فاشلة من الأول بس أنا اللي قاوحت فيها وممكن أجي على نفسي لحد ما أوصل للفشل.
-أنا سينجل ومبسوطه جدا بس مفيش ست تقدر تستغنى عن الرجل ولا الرجل يستغنى عنها بس لازم يبقى بينهم انبساط.
-أسهل حاجة إن الواحد يطلع ترند بس الفكرة إني أجيب حاجة كويسة.
-مش ممكن ألبس الحجاب لإني بشوف الحجاب أخلاق وأنا معجبة بأخلاقي.
