زوجة أشرف مصيلحي: منة شلبي بعتتلنا دكاترة على البيت وهنيدي جابلنا شوال فلوس
أعربت المخرجة منال الصيفي، عن امتنانها لأصدقائها وأصدقاء زوجها الفنان أشرف مصيلحي من الوسط الفني، وذلك بعد مساندتهم له منذ إصابته بالسرطان قبل ثلاث سنوات، موضحة أنهم يعرضون المساعدات بالرغم من عدم احتياجهم لها.
تصريحات زوجة أشرف مصيلحي عن تعامل زملائه مع مرضه
وقالت منال الصيفي خلال تصريحاتها لـ القاهرة 24: ألف حمد وشكر لله إن أشرف مصيلحي ربنا محوجهوش لحد، النقابة بتدخل وبتساعد وبتقول ده حقه، والناس في الوسط بتاعنا كويسين جدًا وأمير كرارة قالي ابعتيلي رسالة وأنا مش هقول لحد، ومحمد هنيدي والله جابلي شوال فلوس، الحقيقة أنا ساعات بقعد أعيط؛ لأني مش مصدقة حب أصدقائه ليه.
وأضافت: منة شلبي كلمتني وهي بتصور في لبنان وبعتت دكاترة على البيت وكانت بتديني نصائح، أنا بشكرهم كلهم وحقيقي هما عزوة وسند، مفيش حد مبيتصلش يسأل عليه ويحب يساعد، الدنيا فيها ناس كتير كويسة.
وأضافت: أول يوم ما أعلنت أن أشرف عنده سرطان هو مكنش مستوعب حاجة خالص والدكتور قال أنه في دنيا تانية، وأشرف مكنش يعرف طبيعية الورم اللي عنده حتى الكيمياوي كان بياخده حبوب وكنت بقوله أن ده دواء علشان الورم ميبقاش خبيث.
وأعربت منال الصيفي عن غضبها، بشأن اتهامها بالتسبب في مرض زوجها الفنان أشرف مصيلحي، قائلة: ناس قالوا ليه مقالتش عن مرضه ومعالجتهوش وضيّعته وقالوا يا حرام مراته معالجتهوش، الموضوع بيضحكني ومش قادرة أفهم بيفكروا إزاي، ما تحطوا نفسكم جنب مراته وأولاده وشوفوا عايشين إزاي؟ ولكن ربنا كبير وربنا يشفيه.
