ليلى طاهر: عندي رضا واكتفاء وعمري ما هرجع للفن تاني
أكدت الفنانة ليلى طاهر، أنها لن تعود للفن مرة أخرى بعد قرار اعتزالها، مشيرة إلى أن الموضوعات التي تناقش حاليَا اختلفت بشكل كبير عن السابق.
وقالت ليلى طاهر في تصريح خاص لـ القاهرة 24: عمري ما هرجع تاني للفن، وعندي رضا واكتفاء عن مشواري الفني كله.
وتابعت ليلى طاهر: قدمت تراث عظيم طوال مشواري، وبحترم تاريخي جدًا، والجمهور بيحبني من خلال أعمالي السابقة وبيحترمها وبيقدرها، والموضوعات اللى بتتناقش حاليًا مختلفة عن الدراما سابقَا.
وأوضحت ليلى طاهر: لا يمكن أرجع أقدم حاجة أقل من اللي قدمتها قبل كده، وفي أعمال اتعرضت عليا خلال السنوات السابقة كانت أقل من كل اللى قدمته، ولكن مش أقل من قدري.
وعن رأيها في الدراما بالوقت الحالي، ردت ليلى طاهر: سعيدة بالدراما والأعمال الدرامية في مستوى كويس، لكن بعد غيابي سنوات ماينفعش أرجع تاني خلاص، والجمهور أكيد عاوز ليلى طاهر بتاعت زمان بالأعمال الحلوة اللي كنا بنعملها، حتى الموضوعات دلوقتي اتغيرت بقى شكلها حاجة تانية وأعمال زمان مش موجودة حاليًا، ولكن أنا سعيدة بالدراما وفي نجوم جداد متميزين.
وحول علاقتها بالفنانين، أكدت ليلى طاهر: طول عمرى علاقتي بالفنانين كويسة مش زيارات طوال الوقت ولا خروجات لإن كبرنا وكل واحد بقى في حاله، لكن لما بتيجي مناسبة معينة بنهني فيها بعض وبنعزي بعض وعلاقتي كانت طول عمرها حلوة بزملائي وزميلاتي.
أعمال ليلى طاهر
وشاركت ليلى طاهر في العديد من الأفلام منها الناصر صلاح الدين، لا تدمرني معك، عفوًا أيها القانون، الاحتياط واجب، المدمن، حكمت المحكمة، عاصفة من الدموع، ليالي ياسمين، تضحك الأقدار، الطاووس، قطة على نار، وزمان ياحب.
