هشام ماجد: عمري ما حلمت أكون ممثل.. وكنت حاسس الناس بتنافقنا في العرض الخاص لـ ورقة شفرة
تحدث الفنان هشام ماجد، عن بداياته في مجال التمثيل هو والفنانين أحمد فهمي وشيكو، مشيرًا إلى إنه لم يكن يحلم بأن يصبح ممثلًا، كما كشف كواليس تعاونه كمؤلف مع الفنان محمد سعد في فيلم بوشكاش.
هشام ماجد: عمري ما كان حلمي إني أكون ممثل
وقال هشام ماجد خلال تصريحات تليفزيونية: وقت لما كنا بنعمل رجال لا تعرف المستحيل كنا بنهزر ومكنتش أتوقع إننا نوصل لكل ده، لأن عمري ما كان حلمي إني أكون ممثل، بس مع الوقت بتكتشف جواك مواهب مكنتش عارف إن هي عندك، وابتدينا في الجامعة نعمل رجال لا تعرف المستحيل وانتشر جدا وكنا بنعمل أفلام قصيرة، ومن فيلم للتاني حبينا الشغلانة وبدأنا نشتغل على نفسنا، وإحنا أول ناس تعمل السينما المستقلة بكاميرا فيديو.
وتابع هشام ماجد، متحدثًا عن تداخل مجال الهندسة والتمثيل معًا: اتخرجت من هندسة وابتديت اشتغل مهندس ونسيت التمثيل شوية، لغاية ما جت فرصة في التانية وكنت بعمل الأفلام دي وأنا لسة في الهندسة، لغاية ما اكتشفت إن التمثيل هو الكارير بجد، والموضوع مش مجرد هزار، ده هيبقى أكل عيشي فعلا، فـ سبت هندسة وبدأت أركز في التأليف والتمثيل.
هشام ماجد: كنت حاسس الناس بتنافقنا في العرض الخاص لورقة شفرة
وتطرق هشام ماجد للحديث عن فيلم ورقة شفرة، الذي يعد البداية الحقيقة للثلاي: فيلم ورقة شفرة ده بعتبره ابني البكري، وفي العرض الخاص بتاعه، مكنتش مصدق إني شايف نفسي على شاشة كبيرة قدامي وبقول هي الناس دي بجد بتتفرج وبيضحكوا بجد ولا بينافقونا؟ وكان إحساس غريب لما الناس بدأت تسقف، فالفيلم ده كان أغلى فرحة عندنا في كل أفلامنا.
هشام ماجد: التأليف لغيري فيه تضارب مصالح
وعن جانب التأليف الذي يهواه هشام ماجد بجانب التمثيل، قال:مُقل شوية في التأليف لـ غيري، عشان خلاص بقيت عايز أعمل حاجات لنفسي، فالتأليف لحد تاني بياخد وقت كتير ومجهود ذهني كتير، وبيبقى في تضارب مصالح، يعني ممكن أكون بكتب وألاقي إيفيه عجبني، أقول طب ما أنا اللي عايز أقول ده، فركزت مجهودي في التأليف لنفسي.
كما كشف هشام ماجد، كواليس تأليفه هو وأحمد فهمي، فيلم بوشكاش لـ الفنان محمد سعد، وقال: أنا وأحمد فهمي كنا كاتبين جزء من فيلم بوشكاش قبل ما نعرف إن محمد سعد اللي هيعمله، فلما عرفت إننا هنعملهوله، فرحت فرحة غير عادية، أنا بحبه وهو قعدته حلوة، ودخلتله فيلم بوحة 3 مرات.
هشام ماجد: محمد سعد ودانا إسكندرية عشان نكتب فيلم بوشكاش
وتابع هشام ماجد: بس ساعتها محمد سعد قالنا الفيلم ده مش هيتكتب كدة، إحنا نطلع إسكندرية، وفعلا طلعنا وفضل كل يوم يجيبلنا سمك وجمبري ونقعد ناكل ونكتب وخلصنا الفيلم.
وعن أعماله القادمة، قال هشام ماجد: بصور حاليًا فيلم اسمه فاصل من اللحظات اللذيذة، هو فيلم كوميدي من إخراج أحمد الجندي ومعايا هنا الزاهد وبيومي فؤاد ومحمد ثروت والطفل جان رامز، وأضاف هشام مازحًا: جان ده طفل في التلاتين من عمره.
